Ystanbulda jańa jylda bolǵan teraktige qatysty sot protsesi bastaldy
ASTANA. QazAqparat - 11 jeltoqsan, dúısenbi kúni Ystanbuldyń 27-inshi qylmystyq sotynda 2016 jyldyń 31 jeltoqsanynda Ortakeı aýdanyndaǵy Reina túngi klýbynda bolǵan lańkestik áreket isiniń birinshi tyńdalýy ótedi.
Lańkestik áreket saldarynan 39 adam qaza taýyp, 122 adam zardap shekti, olardyń qatarynda 60 shetel azamaty bar, dep habarlaıdy «Anadoly» agenttigi.
Іs boıynsha 57 adam qaralady, olardyń 51-i, sonyń ishinde lańkestik áreketti oryndaýshy Abdýlkadır Masharıpov ta bar.
Tergeý Ystambuldyń bas prokýratýrasynyń lańkestik jáne uıymdasqan qylmyspen kúres jónindegi bóliminiń prokýrory Gekalp Kekchýdyń baqylaýymen júrgizildi.
90 bettik aıyptaý aktisi ázirlendi.
Prokýratýra Abdýlkadır Masharıpovtyń ómir boıy qatań tártiptegi túrmede jazasyn óteýin talap etip otyr.
Tergeý kezinde Masharıpov DAISh lańkestik uıymynyń qyzmetine qatysy bar ekenin moıyndap, Reina-daǵy shabýylǵa deıin basqa lańkestik áreketterge qatyspaǵanyn málim etti.
Lańkes túngi klýbqa jasalǵan shabýyl hrıstıandardan kek alý maqsatynda jasalǵanyn aıtty.
«Sırııalyq Abý Djıhad ózara baılanys barysynda Ystanbuldyń Taksım aýdanyna shabýyl jasaýdy buıyrdy, alaıda bul aýdanda polıtsııa qyzmetkerleri kóp júretindikten, Ortakeı aýdanyndaǵy hrıstıandardy nysanaǵa alý kózdeldi», - dedi ol.
«Sırııaǵa ótý úshin men Ystanbulda kúttim. Áıelim jáne balalarymmen ketýimiz kerek bolatyn. Túngi klýbtaǵy shabýylǵa kelsek, men Reina-ǵa ólý úshin barǵanmyn. Shabýyldan keıin klýbtan zardap shekken adamnyń keıpin jasap shyqtym, artynsha taksıge otyryp, jasyrynyp jatqan páterime jettim», - dedi terrorıst tergeý barysynda.
