Ystanbulda áskerı tikushaq úıdiń tóbesine qulap, 4 adam qaza tapty

YSTANBUL. QazAqparat - Ystanbul qalasynyń Sandjaktepe aýdanynda áskerı tikushaq apatqa ushyrap, saldarynan tórt adam qaza bolyp, bir áskerı azamat jaraqat aldy, dep habarlaıdy Anadoly agenttigine silteme jasaǵan «QazAqparat» HAA.

Tikushaqtyń Topchýlar úı oramyndaǵy Fyrtyna kóshesinde ornalasqan tórtqabatty úıdiń shatyryna qulaǵany habarlanyp otyr.

Oqıǵa ornyna polıtsııa qyzmeti, órt sóndirýshiler men jedel járdem kólikteri kelip jetti.

Zardap shekken áskerı azamat aýrýhanaǵa jetkizildi.

Sandjaktepe aýdanyna Túrkııa eliniń Ulttyq qorǵanysy mınıstri Hýlýsı Akar keldi.

Túrkııa prezıdenti Rejep Taıyp Erdoǵan apattan qaza bolǵandardyń otbasylaryna kóńil aıtyp, jaraqattanǵan áskerı azamattyń tezirek saýyǵyp ketýine tilektestigin bildirdi.