«Ystanbul-Túrkistan» reısinde bortta shylym shekken jolaýshyǵa aıyppul salyndy

NUR-SULTAN. QazAqparat - «Ystanbul-Túrkistan» baǵytyndaǵy áýe reısi kezinde ushaq bortynda temeki tartqan jolaýshy jaýapkershilikke tartyldy. Bul týraly QR ІІM Kóliktegi Polıtsııa departamenti basshysynyń birinshi orynbasary Qalıjan Qoblandın málim etti, dep habarlaıdy QazAqparat tilshisi.

«Ystanbul-Túrkistan» áýe reısindegi jolaýshynyń zańsyz áreketi týraly Túrkistan qalasynyń áýejaıyndaǵy Polıtsııa bólimine «Fly Arystan» áýekompanııasynyń ókili habarlaǵan.

«Kóliktegi polıtseıler tekserý barysynda 67 jastaǵy Almaty qalasy turǵynynyń ushaq bortynda shylym shekkeni anyqtaldy. Jolaýshyǵa QR Ákimshilik quqyqbuzýshylyq kodeksiniń 441-baby 1-2 tarmaǵyna sáıkes «Áýe kemesi bortynda temeki ónimin qoldanǵany úshin ákimshilik hattama toltyrylyp, 50 AEK (142 850 teńge) kóleminde aıyppul salyndy», - dedi Qalıjan Qoblandın.

Sondaı-aq, departament basshysynyń orynbasary osyǵan uqsas jaǵdaıdyń elorda áýejaıynda da tirkelgenin aıtty.

«Almaty-Nur-Sultan» baǵytynda ushyp kelgen 25 jastaǵy elorda turǵyny men «Máskeý-Nur-Sultan» baǵytynda ushqan 39 jastaǵy astanalyqqa ushaqta temeki tartqany úshin ákimshilik hattama toltyrylyp, 50 AEK kóleminde aıyppul salyndy», - deıdi ol.