Ystanbul turǵyndary «Altyn adamdy» kóre alady

ASTANA. QazAqparat - Ystanbuldaǵy túrki jáne ıslam óneri murajaıynda TÚRKSOI Halyqaralyq túrki mádenıeti uıymy jáne Qazaqstan Respýblıkasy Ortalyq memlekettik murajaıy uıymdastyrǵan «Uly Dalanyń tarıhı-mádenı murasy» atty kórme ashyldy, dep habarlaıdy TÚRKSOI baspasóz qyzmetine siltememen «QazAqparat» HAA.

Kórmeniń ashylýyna Qazaqstan men Túrkııadan birqatar joǵary qyzmettegi qonaqtar, óner baǵalaýshylary qatysty.

Óz sózinde TÚRKSOI uıymynyń Bas hatshysy Dúısen Qaseıinov Halyqaralyq túrki mádenıeti uıymy bıylǵy jyly TÚRKSOI uıymynyń 25 jyldyǵy aıasynda túrki mádenıeti men ónerin áıgilendirý maqsatymen álemniń túkpir-túkpirinde aýqymdy is-sharalar ótkizip otyrǵanyn atap ótti.

TÚRKSOI uıymynyń basshysy, sondaı-aq, búkilálemdik mádenıet jáne óner astanasy bolyp tabylatyn Ystanbulda osy joly Qazaqstannyń Ortalyq memlekettik murajaıymen birlesip biregeı kórme ashylatynyn habarlady. Alyp qala turǵyndary bul kórmede qazaq jeriniń arheologııalyq, etnografııalyq, sondaı-aq tarıhı-mádenı murasymen jaqynyraq tanysý múmkindigine ıe bolady.

Dúısen Qaseıinovtiń aıtýynsha, tarıh pen mádenıet súıýshileri kórmede qoıylǵan eksponattardyń arasynda túrki halyqtarynyń burynǵy tarıhy týraly stereotıpterdi ózgertip, Qazaqstan Respýblıkasynyń ulttyq sımvolyna aınalǵan «Altyn adamdy» da kóre alady.   

Kórmeniń barysynda TÚRKSOI halyq aspaptary orkestrindegi qazaq mýzykanttary dástúrli qazaq mýzykasynyń shaǵyn kontsertin usyndy.

«Uly Dalanyń tarıhı-mádenı murasy» kórmesi 2018 jylǵy 9 jeltoqsanyna deıin jumys isteıdi.