Ystanbul - Almaty baǵytyndaǵy ushaqta shylym shekken ózbekstandyq reısten túsirildi
ASTANA. QazAqparat - Almaty áýejaıynda «Ystanbul - Almaty» baǵytyndaǵy áýe kemesinde shylym shekken Ózbekstan azamaty reısten túsirildi, dep habarlaıdy QazAqparat Almaty qalasy Kóliktegi polıtsııa departamentine silteme jasap.
Departamenttiń habarlaýynsha, jyl basynan beri eldegi kólik polıtseıleri túrli ákimshilik quqyqbuzýshylyqtar úshin 11 419 adamdy ákimshilik jazaǵa tartty. Onyń ishinde rusqat etilmegen oryndarda shylym shekken 894 adam bar.
«2019 jyldyń 4 naýryzynda Almaty qalasynyń áýejaıyndaǵy Jelilik polıtsııa bólimshesine «Eır Astana» AQ áýe kompanııasynyń ókilinen «Ystanbul - Almaty» áýe reısinde tártip buzǵan jolaýshy týraly habar kelip tústi. Tekserý barysynda kólik polıtseıleri 43 jastaǵy Ózbekstan azamatynyń ushaq bortynda shylym shekkenin anyqtady. Áýe kemesi komandıriniń aktisimen jolaýshy reısten túsirildi», - dep habarlady Almaty qalasy Kóliktegi polıtsııa departamentiniń baspasóz qyzmeti.
QR Ákimshilik quqyqbuzýshylyqtar týraly kodeksiniń 564-baby, 5-bóligine (Jolaýshynyń áýe kemesiniń qaýipsizdik erejelerin buzýy) sáıkes, quqyq buzýshyny ákimshilik jazaǵa tartý úshin oqıǵa materıaldary QR Indýstrııa jáne ınfraqurylymdyq damý mınıstrligi Azamattyq avıatsııa komıtetine jiberildi.
Kólik polıtsııasy ushaqtaǵy qaýipsizdik erejelerin buzǵan jolaýshylarǵa 200 AEK kóleminde aıyppul salynatynyn nemese 15 kúnge deıin ákimshilik qamaý jazasy qoldanylatynyn eske saldy.
