Ystambulda Pıkassonyń kartınasyn satpaq bolǵan kontrabandashylar ustaldy
ASTANA. QazAqparat - Kontrabandamen kúres jónindegi túrik basqarmasynyń qyzmetkerleri Ystambulda Pablo Pıkassonyń polotnosyn satpaq bolǵan halyqaralyq qylmystyq toptyń múshelerin ustady, dep habarlady «Peterbýrgskıı dnevnık» basylymy Anadolu agenttigine silteme jasap.
1940 jyly jazylǵan «Shashyn tarap turǵan jalańash áıel» kartınasy Nıý-Iorktegi kollektsıonerdiń úıinen urlanǵan bolatyn.
Polıtsııa qyzmetkerleri satyp alýshylar bolyp kontrabandashylarmen baılanysqa kirdi. Qaskóıler áýeli 8 mln. dollar surap, keıinirek 1 mln. dollar jeńildik jasaýǵa kelisti jáne dámhanalardyń birinde kezdesý belgiledi, olar aqshany berý ústinde qolǵa tústi.
Qazirgi kezde tergeý júrip jatyr, sot aldyndaǵy tekserý amaldary bastaldy.
Pıkasso álemdegi eń qymbat sýretshilerdiń biri, onyń shyǵarmalary kontrabandashylar arasynda da zor qyzyǵýshylyq týdyrýda.
