Ystambulda kezekti mıtıngi sý shashylyp, gazben atqylanyp taratyldy
ASTANA. 14 shilde. QazAqparat - Túrik polıtsııasy Redjep Taıyp Erdoǵan úkimetine qarsy Ystambul qalasyndaǵy kezekti aktsııany taratýda sý shashatyn quraldar men kózden jas aǵyzatyn gazdy qoldandy, dep habarlady RBK.
Qarsylyq bildirýshiler 2013 jylǵy 13 shildede sherýmen Gezı saıabaǵyna baǵyt alǵan bolatyn, alaıda polıtseıler toptanǵan adamdardy qýyp taratyp, olardyń Taksım alańy mańyndaǵy Istıklıal kóshesine shoǵyrlanýyna múmkindik bermedi.
Polıtsııa kúshterimen qatar sherýshiler saýdagerlerdiń qarsylyǵyna da tap boldy, qala ortalyǵynda birneshe apta boıy ótip jatqan qarsylyq aktsııalary olardyń bıznesine kesirin tıgizýde.
Sherýge Sáýletkerler men ınjenerler qaýymdastyǵyn qala qurylysy jobalaryn maquldaý nemese bas tartý quqyǵynan aıyrýdy kózdeıtin zań jobasy sebep boldy. Osy aptada parlament maquldaǵan zań jobasyn oppozıtsııa aktsııaǵa belsene qatysqan kásipqoı birlestikten úkimettiń ósh alýy dep qarastyrýda. Osy qaýymdastyq músheleri Gezı saıabaǵyn qaıta qurý josparyna talap-shaǵym bergen bolatyn, bul qarsylyq tolqynynyń boı kóterip, kópkúndik tártipsizdikke ulasýyna ákep soqtyrdy.
Polıtsııamen qaqtyǵystar saldarynan Túrkııany túgeldeı derlik sharpyǵan qarsylyq aktsııasy barysynda bes adam kóz jumdy jáne birneshe myń adam jaralandy. Jappaı qarsylyq kórsetý qazirgi el premer-mınıstri Redjep Taıyp Erdoǵan bılikte bolǵan onjyldyqtaǵy eń aýqymdy shara bolyp otyr.
