Ystambulda Qazaqstannyń zamanaýı sýretshileriniń týyndylary kópshilik nazaryna usynyldy
ASTANA. QazAqparat - Ystambuldyń nyshany - Taksım alańynda ornalasqan «Maksem - Respýblıkalyq kórkemóner galereıasynyń» tarıhı ǵımaratynda Qazaqstannyń Túrkııadaǵy elshiligi men «Has Sanat» óner galereıasynyń uıymdastyrýymen qazaqstandyq úzdik sýretshilerdiń «Zamanaýı qazaq óneri» atty kórmesiniń saltanatty ashylýy ótti.
Kórmeniń ashylý saltanatyna Tótenshe jáne Ókiletti Elshi Janseıit Túımebaev, Ystambul provıntsııasy gýbernatorynyń orynbasary Ysmaıyl Gúltekın, Ystambul qalasy merııasynyń Halyqaralyq departamentiniń basshysy Selámettın Ermısh, qalalyq ákimshilik Mádenıet departamentiniń basshysy Abdrahman Shen, sondaı-aq, túrik iskerler, akademıkalyq jáne qoǵamdyk top ókilderi, ataqty mádenıet qaıratkerleri, Ystambulda bilim alyp jatqan qazaq jastary men sheteldik stýdentter, qazaq dıaspora jáne jergilikti BAQ ókilderi qatysty.
Sýret ónerin qadirleýshileriniń nazaryna ártúrli janrlar men baǵyttarda oryndalǵan zamanaýı qazaqstandyq sýretshileriniń jumystary usynyldy.
Ystambul gýbernatorynyń orynbasary I.Gúltekın eki eldi jaqyndastyratyn Qazaqstan men Túrkııa arasyndaǵy mádenı-gýmanıtarlyq baılanystyrynyń damýynyń mańyzdylyǵyn atady.
«Qazaqstandaǵy zamanaýı óneriniń damý qarqynyna qaraıtyn bolsaq, Qazaqstannyń óz Táýelsizdiginiń 25-jyldyq mereıtoıynda kóptegen salalar boıynsha jetistikterge qoljetkize alǵandyǵyn kóre alamyz», - dedi I.Gúltekın.
«Has Sanat» óner galereıasynyń dırektory Janat Eńsebaeva kórmeniń 2006 jyly Máskeýde bastaý alǵan halyqaralyq «Altyn ǵasyr» jobasynyń jalǵasy ekendigin aıtty. Sodan beri qazaqstandyq sýretshileriniń sýretteri kóptegen elder men qalalarda kórmege shyǵaryldy: Varshava, Vrotslav, Berlın, Shtýtgard, Mıýnhen, Frankfýrt, Amsterdam, Gaaga, Vena, Brıýssel, Ankara. Kórmelerdiń maqsaty - shetel memleketteriniń turǵyndaryn Qazaqstannyń óneri men mádenıetimen tanystyrý bolyp tabylady. Búginge deıin galereıa 150-den astam iri kórme uıymdastyrdy.
