Ystambulda Búkilálemdik túrki forýmy ótedi
ASTANA. QazAqparat - Erteń Ystambul qalasynda Búkilálemdik túrki forýmy bastalady. «Túrik Azııa Strategııalyq zertteýler ortalyǵynyń» (TASAM) uıymdastyrýymen tórtinshi ret ótkeli otyrǵan alqaly jıynǵa Halyqaralyq Túrki akademııasy qoldaý kórsetip otyr. Bul týraly akademııanyń baspasóz qyzmetinen habarlandy.
Forým barysynda Túrki dúnıesiniń «Qyzyl alma» syılyǵy tabys etiledi. Atalǵan syılyq ótken jyldan bastap berile bastaǵan. Marapat «Memleket», «Bıznes», «Ǵylym», «Mádenıet» syndy birneshe atalym boıynsha taǵaıyndalady.
«Jalpylama alǵanda «Ashyq dıplomatııa. Medıa. Aqparat» taqyrybynda 3 kúnge josparlanǵan forýmnyń bir sessııasy áıgili Shanaqqala shaıqasynyń 100 jyldyǵyna arnalady. 2010 jyldan turaqty ótkizile bastaǵan forýmǵa jyl saıyn 60-tan astam memleket qatysady. Bıyl da osynsha elden memleket jáne qoǵam qaıratkerleri, zııaly qaýym ókilderi, ǵalymdar men halyqaralyq uıym basshylary qatysady dep kútilýde», - delingen baspasóz baıanynda.
