Ys tııýden saqtaıtyn datchıkterdi qaıdan jáne qanshaǵa satyp alýǵa bolady
NUR-SULTAN. QazAqparat – Ysty gaz týraly eskertetin datchıkterdi qaıdan jáne qanshaǵa satyp alýǵa bolady? Bul suraqqa elordada ótken baspasóz máslıhatynda QR ІІM Tótenshe jaǵdaılar komıtetiniń tóraǵasy Vladımır Bekker jaýap berdi, dep habarlaıdy QazAqparat tilshisi.
«Datchıkterdi bazarlardan, dúkenderden taýyp alýǵa bolady. Naqty qaıda satatyny týraly málimetti jergilikti departamentter men basqarmalardan bilip alý kerek. Óndirýshilerine qaraı datchıkterdiń baǵasy 4-10 myń teńge aralyǵynda», - dedi Vladımır Bekker.
Komıtet tóraǵasynyń aıtýyna qaraǵanda, osy ýaqytqa deıin úılerge ornatylǵan datchıkterdiń qyzmetterine tekserý júrgizilgen. Nátıjesinde, osy qurylǵy belgi berip, úı ıelerin qaýipten saqtap qalýdyń ondaǵan jaǵdaıy Almaty, Shyǵys Qazaqstan oblystarynda tirkelgen.
«ıAǵnı, mundaı qurylǵylardyń naqty paıdasy barshylyq. Biraq, keıde qyzyq jaǵdaılardy kezdestirip jatamyz. Úılerge datchıkterdi ornatyp ketsek, qaýipten eskertken álgi qurylǵynyń daýysynan adamdardyń mazasy qashyp, ony óshirip tastaǵan kórinedi. Áıtse de, datchıkter sizdi tolyqtaı qaýipten saqtaıdy degen áńgime joq. Barlyq qaýipsizdik erejelerin ustaný kerek», - dedi ol.
