Yrysty eselep, memlekettilikti bekemdeıtin qadam - Baqytbek Smaǵul
Baqytbek Smaǵuldyń pikirinshe, buǵan birneshe sebep bar.
«Qazaqstan dúnıejúzindegi eń ozyq damyǵan otyz memlekettiń birine aınalýǵa den qoıǵany málim. Ol úshin elimiz álemdegi qarqyndy ózgergen jaǵdaılarǵa jyldam ári utymdy beıimdele bilgeni jón. Demek, bul qadam saılaý sekildi memlekettik mańyzdy isti keler jylǵa deıin sozbalańǵa salmaı, álemdegi ahýaldyń odan ári kúrdelenýin kútpeı, aldyn ala qımyldaýǵa baǵyttalýda. Áıtpese, tegeýrini myqty, tepkisi qatty zamanda elektoraldy kezeńniń kópke uzaýy memlekettiń damýyn tejeýi, kóshin keri ketirýi yqtımal», - deıdi qoǵam qaıratkeri.
Májilis depýtatynyń aıtýynsha, kezekten tys Prezıdent saılaýynerte ótkizý, bul bılik tranzıtin aıaqtaý, memleket taǵdyryn, el tizginin Qazaqstan halqy saılaǵan Prezıdentke tabystaý úshin kerek. Osynyń arqasynda memleket óz ishindegi qoǵamdyq pikirdi tynyshtandyryp qana qoımaı, ózine suq kózin qadaǵan syrtqy kúshterdi de sabasyna túsiredi.
«Bul - el ekonomıkasyna mol qarjy salǵan sheteldik ınvestorlardy alańdaýshylyqtan aryltý úshin de qajet: olar eldiń tizgini turaqty prezıdentte bolýyn qalaıdy. Qazirgi kezde almaǵaıyp álem alasapyranǵa túsýde. Kóptegen elder saıası, áleýmettik, ekonomıkalyq qıynshylyqtar men qaıshylyqtar qyspaǵynda qalýda. Al Qazaqstan jahandanýdyń bul teris qubylystaryna qarsy qarymdy qaırat kórsetip, tegeýrindi tospa quryp, olardyń memleketke jáne óz azamattaryna nuqsan keltirýine jol bermeýde. Onyń ornyna Elbasynyń «Áleýmettik qamqorlyq» jańa áleýmettik bastamalary arqasynda memleketimiz halyqqa qýatty qoldaý kórsetýde. Bul tek aýqatty, áleýetti elderdiń qolynan ǵana keledi.
Elimizdiń Ata zańynda: «Qazaqstan Prezıdenti - halyq pen memlekettik bılik birliginiń, Konstıtýtsııanyń myzǵymastyǵynyń, adam jáne azamat quqyqtary men bostandyqtarynyń nyshan-sımvoly ári kepili» dep jazylǵan. Endeshe bul mańyzdy iske barsha Qazaqstan halqy da jaýapkershilikpen qarap, belgilengen kúni óz yqtııaryn bildirerine senimdimin.
Osy arqyly qazaq eli kóshimizdiń túzý, yntymaǵymyzdyń berik, baǵdarymyzdyń aıqyn, keleshegimizdiń jarqyn ekenin taǵy bir aıǵaqtaı túsedi», - dedi sózin qorytyndylaǵan Baqytbek Smaǵul.
