«Yrys» MQU ońtústikqazaqstandyqtarǵa 5,5 paıyzdyq mólsherlememen nesıe bere bastady
ShYMKENT. QazAqparat - Ońtústik Qazaqstan oblysyndaǵy «Yrys» mıkroqarjy uıymy «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda 5,5 paıyzben 108 jobaǵa qoldaý kórsetti.
Buǵan deıin de qarjy uıymy kásibin dóńgeletemin degen sharýaǵa tómengi 7-9 paıyzdyq mólsherlememen nesıe berip kelgen bolsa, bıyldan bastap, baǵdarlama sheńberinde eń az mólsherlememen qarjy berýde. Bul óńirdegi kásibin jańadan ashýǵa nıet bildirgen adamǵa úlken kómek dep habarlaıdy OQO ákiminiń baspasóz qyzmeti.
Aıta keteıik, «Yrys» mıkroqarjy uıymy osy ýaqytqa deıin jalpy somasy 28,5 mlrd. teńgeni quraıtyn 15 956 jobaǵa qoldaý kórsetken. Yrystan qoldaý tapqan jobalar aıasynda 13 697 jańa jumys orny ashyldy. Al, 2017 jyldyń 9 aılyq kórsetkishi boıynsha uıym jalpy somasy 5 465, 300 myń teńgeni quraıtyn 2110 jobany qarjylandyrdy.
Atap aıtqanda «Jumyspen qamtý 2020 jol kartasy» baǵdarlamasy boıynsha 2 264,1 mln teńgege 851 joba, «Kóktemgi egin egý-jınaý» baǵdarlamasy boıynsha 1 500,0 mln teńgege 880 joba, «Nátıjeli jumyspen qamtýdy jáne jappaı kásipkerlikti damytýdyń 2017 - 2021 jyldarǵa arnalǵan baǵdarlamasy» aıasynda 400 mln teńgege 108 joba, al, mekemeniń óz qarajaty esebinen 1 298,2 mln teńgege 271 joba qarjylandyrylǵan.
Sonymen qatar osy jyly «Yrys» MQU tarapynan 16 kooperatıv 287,3 mln teńgege qarjylandyrylyp otyr. Jalpy qarjy ortalyǵy bıylǵy jyly 6 000 mln teńgege 2 300 jobany qarjylandyrýdy josparlap otyr.
Al «Nátıjeli jumyspen qamtýdy jáne jappaı kásipkerlikti damytýdyń 2017 - 2021 jyldarǵa arnalǵan baǵdarlamasy» aıasynda 900 mln teńge qarajat tartý boıynsha jumystar júrgizilip, jyl sońyna deıin tolyq ıgerý josparlanýda.
