Yrǵyzǵa gaz keldi

Osylaısha, «QazTransGaz» AQ Yrǵyz aýdanynyń ortalyǵyndaǵy kóshearalyq jáne jetkizýshi gaz qubyrynyń qurylysyn aıaqtap, 6 myń turǵyndy kógildir otynmen qamtamasyz etip otyr. Bul maqsatta avtomattandyrylǵan gaz taratý stantsııasy, blokty gaz retteý pýnkti, 38 shkafty gaz retteý pýnkti, 164 shaqyrym jetkizýshi gaz qubyry men uzyndyǵy 53 shaqyrymdy quraıtyn kóshearalyq gaz qubyry salyndy. Bul ınvestıtsııalyq joba Ulttyq operatordyń oblystyń eldi mekenderin gazdandyrý jáne gaz taratý júıelerin jańǵyrtý aıasynda júzege asyrylǵan. Saltanatty sharada sóz alǵan oblys ákimi Berdibek Saparbaev:

- Bıyl Qazaqstan úshin erekshe jyl. El Táýelsizdiginiń shırek ǵasyrlyq toıyn atap ótkeli otyrmyz. Osy 25 jylda elimizdiń jetken jetistikteri kóp. Ásirese, halyqaralyq deńgeıde abyroıymyz ósip keledi. Egemendik alǵan kúnnen bastap Elbasymyz Nursultan Nazarbaevtyń júrgizip otyrǵan saıasaty qandaı qıyndyqtar bolmasyn, halyqtyń ál-aýqatyn jaqsartýǵa baǵyttalyp jatyr. Mine, sonyń jarqyn kýási - Keńes Ókimeti kezinde bolmaǵan gaz Yrǵyzǵa kelip jetti.

Búginde oblystyń barlyq aýdandaryna gaz keldi. Aqtóbe óńiriniń 92 paıyz halqy gazben qamtamasyz etilip otyr. Osynyń barlyǵy elimizdiń ekonomıkasynyń damyp, memleket basshysynyń óziniń halqyna jasaǵan qamqorlyǵynyń nátıjesinde iske asyp otyr. 

Osy qurylysqa 6 mıllıard teńgeden astam qarjy jumsaldy. Endi jyldyń sońyna deıin keminde 250 úı, 30-dan astam mekeme gazǵa qosylady. Odan keıin úıler daıyndyǵyna baılanysty birte-birte gazǵa qosylatyn bolady. Endigi oıymyz - gaz qubyrynyń boıynda ornalasqan 4 eldi mekendi de qamtysaq dep otyrmyz.

Jalpy, jyldan-jylǵa Yrǵyz aýdanyndaǵylardyń jaǵdaıy jaqsaryp keledi. Oǵan memlekettik baǵdarlamalardyń júzege asyrylýy da áser etýde. Sýarmaly jerler, egin, kókónis, mal - osynyń barlyǵyn kóbeıte bersek, bizdiń jaǵdaıymyz jaman bolmaıdy. Sizderdiń attaryńyzdan «QazTransGaz» aktsıonerlik qoǵamynyń basshylyǵyna alǵysymdy aıtamyn, - dedi.

Odan soń «QazTransGaz» AQ Aqtóbe óndiristik fılıalynyń dırektory Amanjol Tájiǵalıev,  eńbek ardageri Nurqasym Sársenbaıuly, t.b. júrekjardy lebizderin bildirip, aýdan turǵyndary atynan Amantaı Nurbaev aqsaqal aq batasyn berdi. Joǵaryda atalǵandarmen birge Berdibek Saparbaev sol jerde gaz burandasyn burap, ony saltanatty jaǵdaıda iske qosty.

Kópten kútken qýanyshqa kenelgenderdiń biri - Asqar Orynbasarovtyń shańyraǵyna Berdibek Mashbekuly arnaıy baryp, olardyń endi qosylǵan gaz plıtasynda daıyndalǵan dámnen aýyz tıdi. Otaǵasy - 4 balanyń ákesi burynǵydaı eki pesh jaǵyp, qapshyq-qapshyq kúl shyǵarýdan aqyry qutylǵanyna rızashylyǵyn bildirip, el ıgiligi úshin eńbek etken jaýapty mamandarǵa alǵysyn jetkizdi. Óz kezeginde Berdibek Mashbekuly oblys ákimdigi men «QazTransGaz» AQ 19 mıllıard teńgeni quraıtyn memorandýmǵa qol qoıatynyn, soǵan sáıkes 2020 jylǵa deıin barlyq eldi meken gazben qamtylatynyn tilge tıek etip, bul Prezıdenttiń júrgizip otyrǵan saıasatynyń jemisi ekenin qosty.

Aýyldarda ýchaskelik polıtseı jetispeıdi.

Jańa tsehtar ashylady 

Oblys ákimi Berdibek Saparbaev, oblys prokýrory Nurǵalym Ábdirov, Yrǵyz aýdanynyń ákimi Mádı Eleýsizov aýdan ortalyǵyndaǵy Mádenıet úıinde turǵyndarmen kezdesti.

- Aýylǵa oblys prokýrory, departament basshylary kúnde kele bermeıdi. Sondyqtan quqyq qorǵaý, zańǵa qatysty suraqtaryńyz, sheshilmeı júrgen máselelerińiz bolsa, múmkindikti ońtaıly paıdalanyńyzdar, - degen óńir basshysynyń sózinen keıin aýyl turǵyny Terek Qarǵabaev aýdanda ýchaskelik polıtseılerdiń jetispeıtinin, sonyń saldarynan mal urlyǵynyń tyıylmaı turǵanyn aıtty. Bul saýalǵa sol boıda aýdandaǵy jaýapty maman ondaı máseleniń shynymen baryn, qazirgi tańda eki eldi mekende ýchaskelik polıtseıdiń joqtyǵyn rastady. Degenmen, onyń sózinshe, bul - ýaqytsha qıyndyqtar. Kóp uzamaı ol aýyldarǵa tártip saqshylarynyń turaqty qyzmetke baratynyn jetkizdi.

...Barshasyna sóz sóılep, mıkrofon ustaýǵa múmkindik berilgendikten bolar, odan keıingilerdiń barlyǵy ystyq yqylasyn bildirýmen, jerlesterin gazǵa qol jetkizgenin quttyqtaýmen, jeke basynyń máselesin aıtýmen shekteldi. Tipten bir qarııa arnaý óleńin oqyp, erekshelik tanytty. Taqyryptan tys joldanǵan usynys-tilek, ózge de týyndylardy tyńdaǵan Berdibek Saparbaev kóńildi reńkte ótken jıyndy bylaı qorytyndylady:

-  Biz nege eshkini umytyp kettik? Bul janýardy kóbeıtýdi qoıdyq. Ol jylyna eki ret tóldeıdi, ár týǵanda egizden týady. Onyń eti, súti qandaı! Qoıan ósirýge de den qoıýymyz kerek. Tek jylqy, qoıǵa qarap otyrýǵa bolmaıdy.

Sonymen birge, ol kóp uzamaı ár aýdanda et, sút óńdeıtin tsehtardyń ashylatynyn habarlady. «Bul kompanııalarǵa da, osyndaǵy jurtshylyqqa da tıimdi bolady. Burynǵydaı tsehtardyń jumysyn jandandyrýymyz kerek. Qol qýsyryp otyrýǵa bolmaıdy», - dep oıyn túıindedi ol.

Aıta keteıik, kezdesýge oblystyq departament basshylary, oblystyq máslıhat depýtattary da qatysty.

Odan bólek, qaladan kelgen top aýyldaǵy bıyl ǵana ashylǵan «Nur» balabaqshasynyń jumysymen tanysty. 120 kishkentaıǵa shaqtalǵan mektepke deıingi uıymda 20 adam eńbek etedi. Memlekettik jekemenshik seriktestik boıynsha salynǵan balabaqsha barlyq talaptarǵa saı keledi.

Aryz-shaǵymdar tyńdaldy

Tús aýa Berdibek Saparbaev Qyzyljar aýyldyq okrýgine arnaıy baryp, ondaǵy mektep, meshittiń aýjaıyn kórdi. Sońǵysynda - Allanyń úıindegi ımam juma saıyn jamaǵattyń keletinin, biraq olardyń sonshalyqty kóp emestigin jetkizdi. Oblys ákiminiń «Shamamen qansha adam keledi?» - degen saýalyna din qyzmetkeri:

- 20 adamnan astam, - dep kúbirledi. Buny estigen óńir basshysy bul óte az ekenin, jastardy ımandylyqqa tartýda kónekóz qarııalardyń bir kisideı atsalysyp, qalys qalmaýy kerektigin eskertti. Artynsha ımamnan: «Sizge jalaqy tóleı me, qalaı?» dep suraǵan Berdibek Mashbekulyna taqııaly ataı irkilmesten: «Joq, men zeınetkermin ǵoı» dep jaýap berdi. Aýdan ákimine Berdibek Saparbaev:

- Bulaı bolmaıdy. Osy jerde otyryp, meshitke bas-kóz bolǵany úshin 40-50 myń teńge tólep otyrý qajet, - dedi.

Dástúrge saı, bul aýyldyq okrýgte de jergilikti halyqtyń muń-muqtajy, jalpy aıtary tyńdaldy.

Temirbek Zeıinov sýdıalardyń jumysyna renishin bildirip, olardyń otyrysy ashyq ári jarııaly túrde bolsa degen tilegin jetkizse, Shárbaný Baqtybaeva balabaqshada ot jaǵýshy bolyp jumys istegen kúıeýiniń eki aılyq jalaqysynyń ala almaı júrgenin aıtyp, arasha surady. Sońǵy ekeýiniń de aryzy aıaqsyz qalmaıtynyn bildirgen oblys ákimi eńbek etýge, lajy bolsa memlekettik baǵdarlamalarǵa qatysýǵa shaqyrdy. Jıyndy qorytyndylaǵan Berdibek Saparbaev aýylǵa jetken gazdy da ońtaıly paıdalanyp, bunyń kásip bastaýǵa, ásirese jol boıyndaǵy qyzmet kórsetetin ortalyqtardy ashýǵa úlken múmkindik ekenin aıtty.