Sırııadaǵy YPG/SDG terrorısteri tutqyndardy óltirip, ınfraqurylymdy qıratyp ketti
ASTANA. KAZINFORM — YPG/SDG terrorıstik uıymynyń qarýly toptary Evfrat ózeniniń batys jaǵalaýynda ornalasqan, buryn basyp alynǵan Tabka qalasynan sheginý barysynda ózderi ustap otyrǵan tutqyndardy ólim jazasyna kesken. Bul týraly Anadolý agenttigi jazdy.
Sırııanyń resmı SANA aqparat agenttiginiń habarlaýynsha, terrorıster sondaı-aq Eski kópirdi jáne Rakka provıntsııasyna sý jetkizetin negizgi sý qubyryn jaryp jibergen.
Sırııa úkimeti YPG/SDG áreketterin eń qatań túrde aıyptap, olardy Jeneva konventsııalaryna qaıshy keletin soǵys qylmystaryn jasady dep aıyptady.
Tabka qalasynyń mańyndaǵy Mansýra aýdanynda Sırııa armııasy qorshaýǵa alǵan YPG/SDG quramyndaǵy 64 adam qaýipsizdik kúshterine berilgen. Buǵan deıin, aldyńǵy kúni keshki ýaqytta Sırııa armııasynyń strategııalyq mańyzy bar Tabka qalasyn tolyq baqylaýyna alǵany habarlanǵan.
Sırııa Qorǵanys mınıstrliginiń baspasóz qyzmeti taratqan málimetke sáıkes, YPG/SDG quramyndaǵy 483 qarýly adam Sırııa bıligimen baılanysqa shyǵyp, uıym qatarynan shyǵýǵa nıet bildirgen. Qazirgi ýaqytta olardyń 181-i qaýipsizdik kúshterine berilgen.
Buǵan deıin YPG/SDG ókilderi qarýly toptardy Evfrattyń batys jaǵalaýynan tolyq shyǵaryp, ózenniń shyǵys jaǵalaýyna shoǵyrlandyrýdy josparlap otyrǵanyn málimdegen. Alaıda Evfrattyń batysyndaǵy birqatar aýdandarda terrorıster áli de óz qatysýyn saqtap otyr. Bul aımaqtarda úkimettik kúshter men YPG/SDG arasyndaǵy qarýly qaqtyǵystar áli jalǵasyp jatyr.
Keshe Túrkııa prezıdenti Rejep Taııp Erdoǵan Sırııa prezıdenti Ahmed ash-Sharaamen telefon arqyly sóılesip, Sırııadaǵy kúrdeli ahýaldy talqylaǵanyn jazdyq.
Al onyń aldynda YPG/SDG terrorısteriniń Aleppodaǵy sońǵy shtaby Sırııa bıliginiń qolyna ótkenin jazdyq.