YouTube jańa AI-fýnktsııasyn resmı túrde iske qosty
ASTANA. KAZINFORM — YouTube vıdeohostıngi jasandy ıntellekt negizinde jeke beıne taspalaryn jasaýǵa múmkindik beretin jańa fýnktsııany iske qosty. Bul týraly Android Authority-ge silteme jasap, 24kg jazdy.
Jańa múmkindikti paıdalaný úshin qoldanýshy ózine qyzyqty kontentti sıpattaıtyn mátindik suranys engizse jetkilikti. Osy maqsatta YouTube basty betke arnaıy Your custom feed batyrmasyn ornalastyrǵan. Ony basqan kezde prompt engizýge arnalǵan mátindik óris ashylady.
Google kompanııasynyń anyqtama paraqshasynda aıtylǵandaı, paıdalanýshylar belgili bir taqyryptaǵy vıdeolardy kórsetý týraly óz suranysyn jaza alady nemese jasandy ıntellekt usynǵan daıyn nusqalardyń birin tańdaı alady.
Jasalǵan jeke taspany ınterfeıstiń joǵarǵy bóligine bekitýge bolady. Qajet bolǵan jaǵdaıda ony ońaı óńdep, jańa beıne toptamasyn jasaý múmkindigi de qarastyrylǵan.
Aıta keteıik, bul fýnktsııa testilik rejım emes, tolyqqandy resmı relız retinde iske qosylyp otyr. Alǵashqy kezeńde múmkindik AQSh-taǵy akkaýntqa kirgen qoldanýshylarǵa mobıldi jáne kompıýterlik qurylǵylarda birtindep qoljetimdi bolady.
Fýnktsııanyń durys jumys isteýi úshin akkaýnt baptaýlarynda izdeý jáne kórý tarıhyn saqtaý múmkindigi qosýly bolýy kerek. Qazirgi ýaqytta ınterfeıs tek aǵylshyn tilin qoldaıdy.
Eger algorıtm suranysty durys óńdemese, qoldanýshylar beıne taspasynyń janyndaǵy úsh núkte máziri arqyly ázirleýshilerge keri baılanys jibere alady.
Aıta keteıik, TikTok pen YouTube Ulybrıtanııada jasóspirimder úshin áli de qaýipti dep tanylyp otyr.
