YouTube usynatyn árbir bes beıneniń biri –JI arqyly jasalǵan sapasyz kontent
ASTANA. KAZINFORM – Qaralym sanyn arttyrý úshin jasandy ıntellekt (JI) arqyly jasalǵan sapasyz kontent YouTube lentasynyń 20 paıyzdan astamyn quraýy múmkin, dep habarlaıdy Kazinform.
Bul týraly beınemontajben aınalysatyn Kapwing kompanııasy júrgizgen zertteý kórsetti.
Sarapshylar JI kómegimen jasalǵan sapasyz kontentti jergilikti jerde qoldanýdyń qanshalyqty keń taralǵanyn túsiný úshin 150 eldegi eń tanymal 100 beınearnany zerttedi.
Zertteý barysynda tolyǵymen JI-slop arqyly jasalǵan tómen sapaly kontentten turatyn 278 arna anyqtaldy. Baǵalaý boıynsha, olar jyl saıyn shamamen 117 mln dollar kiris ákelip otyr.
Esepke sáıkes, Ispanııada jasandy ıntellekt arqyly jasalǵan sapasyz kontentke arnalǵan tanymal arnalardyń jalpy 20,22 mln jazylýshysy bar, bul kez kelgen basqa elge qaraǵanda kóp. «Úshtikte» sondaı-aq Mysyr (17,91 mln) jáne AQSh (14,47 mln) bar.
Ońtústik Koreıada ǵana destrýktıvti oılaýdy nasıhattaıtyn tanymal arnalar 8,45 mlrd qaralym jınady, bul eldegi halyqtyń jalpy sanynan 164 ese kóp. JI qoldanyp túsirilgen beıneleri bar jáne qaralymnyń kóp sanyn jınaǵan eń tanymal on arnanyń beseýi Ońtústik Koreıada, qalǵandary Mysyr, Brazılııa jáne Pákistanda ornalasqan.
- Generatıvtik JI – qural jáne kez kelgen qural sııaqty ony joǵary sapaly jáne tómen sapaly mazmun jasaý úshin paıdalanýǵa bolady. Biz paıdalanýshylarymyzǵa ol qalaı jasalǵanyna qaramastan joǵary sapaly mazmunǵa qol jetkizýdi qamtamasyz etýge nazar aýdaramyz. YouTube-ke júktelgen barlyq mazmun bizdiń qaýymdastyq nusqaýlarymyzǵa sáıkes kelýi tıis, al eger biz mazmunnyń qandaı da bir erejeni buzatynyn anyqtasaq, biz ony tez joıamyz, - dep málimdedi YouTube ókili.
YouTube JI kómegimen jasalǵan mazmunǵa qatysty dılemmaǵa tap boldy.
Bir jaǵynan, YouTube bas dırektory Nıl Mohan generatıvti JI-di YouTube úshin eń mańyzdy jetistik dep ataıdy.
Ekinshi jaǵynan, ol jarnama berýshiler ózderiniń jarnamalary JI-sloptarda ornalastyrylǵandyqtan ózderin qunsyzdanǵan sezinedi degen alańdaýshylyǵyn bildirdi.
Guardian basylymynyń shilde aıynda YouTube derekterine júrgizgen taldaýy «YouTube-te álemdegi eń jyldam damyp kele jatqan arnalardyń árbir onynshysynda tek JI kómegimen jasalǵan kontent bar» ekenin kórsetti.
Buǵan deıin Túrkııa JI kómegimen jasalǵan alǵashqy mýltserıaldy tanystyrǵanyn jazǵan edik.