YouTube-tiń qytaılyq balamasy: Bilibili beıne platformasy jahandyq deńgeıge kóterildi
ASTANA. KAZINFORM – Qytaılyq Bilibili beıne platformasy halyqaralyq qosymshany iske qosý arqyly ishki naryǵynan tys deńgeıge shyǵyp otyr. Kompanııa halyqaralyq aýdıtorııany tartý úshin jeńildetilgen tirkeý jáne jaqsartylǵan lokalızatsııany usynady, dep habarlaıdy Kazinform agenttiginiń Beıjińdegi menshikti tilshisi.
Ázirleýshiler yqpal etý aıasyn keńeıtý jumysy bastalǵanyn qyzmettiń X áleýmettik jelisindegi resmı paraqshasynda jarııalady. Naqtylanǵandaı, qosymsha Android júıesinde qoljetimdi, iOS júıesinde iske qosylýy jáne geografııalyq keńeıýi jaqyn arada josparlanyp otyr.
Jergilikti telefon nómirin baılanystyrýdy jáne sáıkestendirýden ótýdi talap etetin negizgi qytaılyq nusqadan aıyrmashylyǵy – halyqaralyq qyzmet akkaýnt qurýdyń jeńildetilgen protsesin usynyp otyr.
- (Paıdalanýshylar úshin – avt.) búkil álem kontenti, jaqsartylǵan lokalızatsııa jáne qajetsiz tekserýlersiz qarapaıym tirkeý ázirlenedi... Ary qaraı odan da yńǵaıly múmkindikter paıda bolady, - delingen ázirleýshiler málimdemesinde.
Bilibili komandasy erte qoljetimdilik kezeńinde tehnıkalyq máselelerdi sheshý jáne ınterfeısti ońtaılandyrý úshin paıdalanýshylardyń keri baılanysyn kútedi.
Osyǵan deıin YouTube 24 tamyzdan bastap qaralymdardy esepteý tártibin ózgertetinin habarladyq.
