YouTube-tegi sabaq: Mańǵystaýlyq muǵalim 150-ge jýyq vıdeo daıyndady

NUR-SULTAN. QazAqparat – Mańǵystaý oblysyna qarasty Túpqaraǵan aýdanyndaǵy Aqshuqyr mektep-lıtseıiniń qazaq tili men ádebıeti páni muǵalimi Marat Qanı «YouTube» platformasynda jeke kanal ashyp, sabaq ótkizedi. Bul týraly Túpqaraǵan aýdany ákimdiginiń baspasóz qyzmetinen málim etti, dep habarlaıdy QazAqparat tilshisi.

Marat Qanıdiń kórermender sany 5 myńnan asqan. Basym bóligi - muǵalimder men oqýshylar. Ol eldegi karantınge baılanysty beınesabaqtaryn júktep, ár oqýshynyń sabaq oryndaý tártibine mán beredi.

«Respýblıkanyń ár túkpirindegi áriptesterimniń de keregine jarap jatqanyma qýanamyn. Kún saıyn olar kanal arqyly izgi tilekterin joldaıdy. Bastysy qazaqsha kontenttiń artýyna tamshydaı bolsa da úles qosyp jatyrmyn dep oılaımyn», - dedi Marat Qanı.

Jas ustaz bıylǵy oqý jylyndaǵy ІV toqsandy qosa alǵanda barlyǵy 150-ge jýyq sabaq daıyndaǵan.