YouTube-tan qazaq mýltfılmin tappaǵan bala, sheteldik ónim izdeıdi – sarapshy
NUR-SULTAN. QazAqparat – Qazaq tilinde túsirilgen mýltfılmderdi YouTube arnasyna kóbirek jarııalaý qajet. Bul týraly Qazaqstannyń anımatsııalyq kınostýdııalary qaýymdastyǵynyń tóraǵasy Jánibek Orazaly QazAqparat tilshisine aıtty.
«Bizde bilikti mamandar bar. Endi qarjylandyrý tıisti deńgeıde bolsa, jylyna 2 tolyqmetrajdy, 10 qysqametrajdy mýltfılm shyǵarý múmkindigi jasalady. Bul turǵyda «Balapan» arnasynda óndiriletin ónimderdi qosyp otyrǵan joqpyn. Al «Balapan» telearnasynda jylyna óz aldyna 200-300 mınýttyq anımatsııalyq fılmder jasaýǵa qaýqary bar», - dedi J. Orazaly.
Onyń sózine qaraǵanda, búginde «Balapan» arnasyndaǵy sapaly ónimder balalardyń edáýir qyzyǵýshylyǵyn týdyryp keledi.
«Jalpy, balalarǵa ekranda kórsetiletin fılmder ózindik áserin tıgizetini belgili. Sondyqtan «Balapan» arnasynda kórsetiletin anımatsııalyq fılmder sanyn jyl saıyn arttyrǵan durys. Jasyryn emes, búginde balalar «YouTube» kanalyndaǵy mýltfılmderdi kóp tamashalaıdy. Sondyqtan qazaq kórermenderdi joǵaltpaımyz desek, qazaq tilinde túsirilgen sapaly ónimderdi «YouTube» kanalyna kóbirek salǵan durys bolady. Balalar «YouTube» kanalynan qazaqsha mýltfılderdi tappaǵannan keıin, sheteldik ónimderdi izdeı bastaıdy», - dedi qaýymdastyq tóraǵasy.
