YouTube servısteriniń jumysynan taǵy da aqaý shyqty
ASTANA. KAZINFORM – Álemniń ár túpkirinen qoldanýshylar YouTube platformasynyń jumysynda aqaýlar baıqalǵanyn habarlap jatyr. Keleńsizdikter negizinen beınejazbalardy ashýǵa baılanysty bolyp otyr, dep habarlaıdy Downdetector.
YouTube, YouTube Music jáne YouTube TV servısterine qoljetkizý máseleleri jóninde 342 myńnan astam paıdalanýshy shaǵymdanǵan.
Olardyń ishinde 56%-y beınelerdiń oınatylýynda qıyndyq bar ekenin aıtsa, 32%-y qosymshanyń jumysyn, 12%-y saıttyń durys istemeýin jetkizgen.
Portaldyń deregine súıensek, shaǵymdardyń eń kóbi — 268 myńnan astamy AQSh-ta tirkelgen. Ulybrıtanııada shamamen – 62 myń, Japonııadan 19 myń shaǵym túsken.
Aıta ketsek, qyrkúıek aıynyń basynda da paıdalanýshylar Gmail, YouTube, Google Maps, Google Drive, sondaı-aq Google-dyń negizgi izdeý júıesi sekildi platformalardyń qoljetimsiz bolǵanyna jappaı shaǵymdanǵan edi.
Al jaqynda búkil álemde YouTube-tyń pleer ınterfeısi jańardy.