YouTube qaýipsizdik sharalaryn kúsheıtti
ASTANA. QazAqparat - YouTube-tiń shtab-páterinde bolǵan atystan keıin kompanııa barlyq keńsesindegi qaýipsizdikti kúsheıtýdi uıǵardy. Bul týraly Google kompanııasy Týıtterdegi akkaýntynda jarııa etti, dep habarlaıdy Habar 24 telearnasy.
Esterińizge sala keteıik, 39 jastaǵy Nasım Agdam esimdi áıel seısenbide YouTube ǵımaratynda oq atyp, 3 adam jaraqattandy. Qaskóı oqıǵa ornynda kóz jumdy. Ol ǵımaratqa basyp kirip, mańaıdaǵylarǵa oq jaýdyrǵan. Artynsha óz-ózine qol jumsaǵan.
Oqıǵa ornyna jetken arnaıy jasaq ǵımarattaǵylardyń barlyǵyn shyǵaryp, tekserý júrgizdi. Jergilikti arnalardyń habarlaýynsha, qaskóıdiń bul qadamǵa barýyna naqty ne túrtki bolǵany anyqtalǵan joq. Biraq ol Youtube onyń vıdeolaryna shekteý qoıyp, qarajat tabýǵa kedergi keldirdi dep shaǵymdanǵan.
