YouTube 24 tamyzdan bastap qaralymdardy esepteý tártibin ózgertedi
ASTANA. KAZINFORM — YouTube 24 tamyzdan bastap vıdeolardyń qaralymyn esepteý ádistemesin ózgertedi. Endi vıdeo qaralymy rolık oınatyla bastaǵan sátten, ıaǵnı alǵashqy kadrdan bastap esepteledi. Jańa standart álemniń barlyq elinde vıdeonyń barlyq formatyna qoldanylady.
Buǵan deıin platforma ártúrli formattaǵy vıdeolar úshin qaralymdy esepteýdiń birneshe júıesin qoldanǵan. 2025 jyly YouTube qysqa vıdeolarǵa arnalǵan esepteý ádistemesin jańartqan edi. Endi dál osy standart basqa formattarǵa da engizilip, kórsetkishterdi biryńǵaı júıege keltiredi.
Kompanııanyń málimetinshe, bul ózgeris kontent avtorlaryna vıdeolarynyń naqty aýdıtorııasyn jaqsyraq túsinýge jáne ártúrli formattaǵy kórsetkishterdi ózara salystyrýǵa múmkindik beredi. Ózgeristen keıin avtorlardyń jalpy qaralym sany da jyldamyraq ósýi múmkin.
Buǵan deıin qoldanylǵan qaralym kórsetkishi YouTube Analytics júıesiniń «Keńeıtilgen rejıminde» «Belsendi qaralymdar» ataýymen saqtalady. Ol avtorlarǵa kórermenderdiń qanshasy vıdeony ári qaraı kórgenin anyqtaýǵa múmkindik beredi.
YouTube málimdegendeı, jańartý avtorlardyń tabysyna jáne YouTube seriktestik baǵdarlamasyna (YPP) qatysý tártibine áser etpeıdi. Tabys burynǵydaı «Belsendi qaralymdar» jáne «Belsendi paıdalanýshylardyń kórý saǵattary» kórsetkishteri negizinde esepteledi. Bul kórsetkishter YouTube Analytics júıesiniń keńeıtilgen rejıminde qoljetimdi.
Seriktestik baǵdarlamasyna qatysý talaptary da ózgermeıdi. YouTube-taǵy qaralymdardy esepteýdiń osyǵan uqsas algorıtmi TikTok pen Instagram platformalarynda da qoldanylady.
24 tamyzdan bastap jańa kórsetkish YouTube-ta qaralym sany kórsetiletin barlyq jerde paıda bolady. Biryńǵaı esepteý ádistemesi avtorlarǵa aýdıtorııasynyń jalpy aýqymyn dálirek baǵalap, ony seriktester men demeýshilerge kórsetýge múmkindik beredi.
Eske sala keteıik, YouTube jańa AI-fýnktsııasyn resmı túrde iske qosqan bolatyn.
