YONHAP ókili: Koreıa jańalyqtaryna suranysty arttyrý úshin k-pop janrynyń áleýetin paıdalanamyz

NUR-SULTAN. QazAqparat – YONHAP Koreıa Aqparat agenttiginiń jahandyq strategııa tobynyń jetekshisi Jýn Syn Lı óz elindegi aqparattyq saıasatta ınternet-platformalardyń basymdyǵyn paıdalanýdyń mańyzy týraly pikirin bildirdi, dep habarlaıdy QazAqparat tilshisi.

«Osydan 40 jyl buryn qurylǵan YONHAP jańalyq agenttigi – Koreıanyń medıakeńistiginde ortalyq aqparat quraly boldy. Áý bastan kompanııa basqa da jańalyq agenttigi sekildi radıo jáne televızııalyq, mátin kúıindegi jańalyqtardy jergilikti deńgeıde taratyp otyrǵan. Osynaý artyqshylyqtar ondaǵan jyldar boıy YONHAP agenttigin eldegi negizgi jańalyq taratýshyǵa aınaldyrdy. Koreıanyń barlyq jańalyq taratýshy uıymdary YONHAP agenttiginiń jańalyqtaryna súıenip keldi. Ásirese el ishindegi jáne sheteldegi eń shuǵyl jańalyqtardy alyp otyrdy. Kompanııa ózgerip bara jatqan ýaqyttyń talaptaryna árdaıym beıimdelýge tyrysady», - dedi Jýn Syn Lı Astana Media Week 2020 sharasynyń «Mýltıplatformalylyq» plenarlyq sessııasynda.

Onyń aıtýynsha, YONHAP osydan birneshe jyl buryn ınternet-platformalarda birqatar jańalyqtar arnasyn iske qosqan. Sonymen qatar agenttiktiń televızııalyq arnasy da ashylǵan.

«Bizdiń agenttiktiń Facebook, Instagram paraqshalary árdaıym aqparat taratyp otyr. Sonymen birge agenttiktiń Youtube-kontentine de suranys óte joǵary. Álem halqyna qoljetimdi bolýy úshin aqparatty aǵylshyn tilinde de taratamyz. Medıaplatformalardyń kómegimen turaqty ósim qarqynyn saqtap kelemiz. Koreıalyq mádenıetke qatysty aıtar bolsaq, biz kontentti damytý úshin k-pop mýzyka aǵymynyń áleýetin paıdalanamyz», - dedi ol.

Aıta ketsek eloradada Astana Media Week 2020 sharasy ótip jatyr. Іs-sharanyń negizgi maqsaty – otandyq medıasalany damytý men ındýstrııadaǵy iskerlik qarym-qatynasty aımaqtyq jáne halyqaralyq deńgeıde ilgeriletý. Medıaaptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jınap keledi jáne ózekti taqyryptar talqylanady.