Iogamen shuǵyldanyp, ústel tennısin oınaımyn - Toqaev
ASTANA. KAZINFORM – «Turkistan» gazetine suhbat bergen Memleket basshysy Qasym-Jomart Toqaev TMD boıynsha áriptesteriniń qandaı sportpen aınalysatynyn aıtty.
– Densaýlyǵym jaqsy, qan qysymym qalypty. Kún saıyn ıogamen shuǵyldanýdy ádetke aınaldyrdym, biraq medıtatsııa jasamaımyn. Burynǵy kásipqoı sportshymen aptasyna eki ret ústel tennısin oınaımyn. Rasymen, toǵyz keli salmaq tastap, ózimdi áldeqaıda jaıly sezinetin boldym, - dedi Qasym-Jomart Toqaev.
Sonymen qatar Memleket basshysy TMD elderindegi áriptesterinen taǵy kimniń sportqa jaqyn ekenin aıtty.
– Taıaýda Bishkekte ótken beıresmı is-shara kezinde Pýtın jas dzıýdoshyǵa qarsy ádemi ádis jasap, aǵa býynnyń abyroıyn kóterip tastady. Álıev te myqty, kánigi sportshy sııaqty únemi jattyǵady, Japarov fýtbol oınaıdy. Mırzıeev te shıraq, ol jattyǵý zalynda shynyǵady. Pashınıan velosıped tebedi. Lýkashenko áli kúnge deıin hokkeı oınaıdy eken. Kezinde teńiz-áskerı kúshterinde bolyp, ábden shynyqqan Rahmonnyń da densaýlyǵy jaqsy. Bir sózben aıtsam, áriptesterimniń bári de babynda, - dedi Prezıdent.
Qasym-Jomart Toqaev árdaıym qoǵamnyń kóńil kúıi men azamattardyń muń-muqtajyn bilip otyrýǵa tyrysatynyn atap ótti.
- Túıtkildi máseleler men joba-josparlardy ashyq ári týra aıtamyn. Qazaqstannyń áleýetin eseleı túsý úshin áli kóp jumys isteýimiz kerek. Biz bir el bolyp, halyqtyń múddesin qorǵaý jolyndaǵy bıik maqsatymyzdyń bárine jetemiz. Men buǵan kámil senemin, - dedi Memleket basshysy.
Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.