Iod jetispese, aǵzada qandaı ózgerister bolady
ASTANA. KAZIFORM — Iod tapshylyǵy tez sharshaýǵa sebep bolýy múmkin. Degenmen tuzdy kóbeıtpeı-aq ıod tapshylyǵynyń aldyn alýǵa bolady.
Sanıtarııalyq-epıdemıologııalyq baqylaý komıtetiniń baspasóz qyzmeti málimetinshe, ıod — qalqansha beziniń qalypty jumys isteýine, onyń gormondarynyń túzilýine, sondaı-aq aǵzanyń ósýi men damýyna qajetti ómirlik mańyzy bar mıkroelement.
— Iodtyń aǵzaǵa jetkilikti mólsherde túsýi ásirese júktilik, balalyq jáne jasóspirimdik kezeńderde asa mańyzdy. Iod tapshylyǵy qalqansha beziniń qyzmetiniń buzylýyna ákelýi, balalardyń dene jáne aqyl-oı damýyna keri áser etýi, sondaı-aq eńbekke qabilettiliktiń tómendeýine jáne tez sharshaǵyshtyqqa sebep bolýy múmkin, — delingen komıtet taratqan aqparatta.
Aǵzany ıodpen jetkilikti mólsherde qamtamasyz etý úshin tómendegi qarapaıym usynymdardy ustaný mańyzdy:
1. Iodtalǵan tuzdy tańdańyz. Kádimgi tuzdyń ornyna ıodtalǵan tuzdy paıdalanyńyz. Iodtyń jylýmen óńdeý kezinde joǵalýyn azaıtý úshin ony daıyn taǵamǵa nemese taǵam ázirleýdiń sońynda qosqan jón.
2. Tamaqtaný ratsıonyn túrlendirińiz. Iodtyń tabıǵı kózderi bolyp tabylatyn teńiz balyǵy men teńiz ónimderin, sút jáne sút ónimderin únemi tutynyńyz.
3. Balalar men júkti áıelderdiń tamaqtanýyna erekshe kóńil bólińiz. Iodtyń jetkilikti mólsherde túsýi balanyń júıke júıesiniń qalyptasýy men damýy úshin asa mańyzdy.
4. Iodtalǵan tuzdy durys saqtańyz. Ony qaqpaǵy tyǵyz jabylatyn ydysta nemese qaptamada, qurǵaq ári salqyn jerde saqtańyz.
Sonymen qatar, ıodtalǵan tuzdy paıdalaný tuz mólsherin kóbeıtý qajet degendi bildirmeıtinin este ustaǵan jón. Tuz tutynýdy shekteý jónindegi usynymdardy saqtaý qajet.
Júkti jáne bala emizetin áıelderge, sondaı-aq qalqansha beziniń aýrýlary bar adamdarǵa ıodty qosymsha qabyldaý qajet bolǵan jaǵdaıda dárigermen keńesý usynylady.
Osyǵan deıin BAÁ vıtılıgony emdeıtin jańa dárini maquldaǵan alǵashqy el bolǵanyn jazǵanbyz.