Ioahım Lev: Túnniń qaı ýaǵynda bolmasyn, ulttyq komandasyna qoldaý bildirýge kelgen jankúıerlerge qaıranmyn

- Ekinshi taımnyń alǵashqy jartysy týraly ne aıtasyz? Qazaqstan quramasy da Germanııa qaqpasyna qaýip tóndire bastady. Nege nemister quramasy bosańsyp qaldy?

- Ekinshi taımnyń basynda jigitterime men de rıza bolmadym. Jigitter bosańsyp qaldy. Degenmen, aıta ketýim kerek, biz úziliske deıin-aq oıyn taǵdyryn sheship qoıdyq. 2:0 esebi kezinde fýtbolshylardyń qarqyndy azdap azaıtqandaryna túsinistikpen qaraýǵa bolady. Álbette, azýly qarsylastarǵa qarsy kezdesýde bulaısha bosańsymaspyz.

- Birneshe kúnnen keıin atalmysh komandalar qaıta kezdesedi. Bul joly Nıýrnbergte. Qalaı oılaısyz, túzde jeńiske jetken jigitterińiz ekinshi kezdesýde oıynǵa tolyqqandy jınaqtala ala ma?

- Meni de osy jaǵy azdap mazalaıdy. Onyń ústine, túzde jeńiske jetkennen keıin óz jerimizde tipten eki qoldy bos qoıyp oınaýymyz ábden múmkin ekenin de joqqa shyǵarmaımyn. Degenmen, fýtbolshylardyń jetelerine jetkizemin ǵoı. Eshqashan qarsylasty baǵalamaý degen bolmaýy tıis.

- Taza shabýylshysyz oınaǵan qalaı eken?

- Men sizben kelispeımin. Biz bul oıynda bir emes, eki shabýylshymen oınadyq. Alda Marıo Gettse men Tomas Mıýller oıqastady. Bizdiń komandada qajet kezde óz shebin almastyra alatyn ámbebap oıynshylar óte kóp.

- Tomas Mıýller nemisterdiń barlyq golyna óz úlesin qosty. Qalaı oılaısyz, basqalarǵa qaraǵanda jasandy alańda Mıýllerge oınaǵan qolaılyraq boldy ma?

- Solaı sııaqty. Biraq Mıýller kez-kelgen alańda ózin erkin sezinedi. Árdaıym shabýyl ótinde júretinin bilemiz. Degenmen, men eshkimdi de bóle jara atamas edim. Eń bastysy, komanda retinde jaqsy oınaı bildik. Dopty árdaıym óz baqylaýymyzda ustap, qarsylasymyzdy sát saıyn tyǵyryqqa tireýmen boldyq. Árıne, jasandy alańǵa birden úırenise almadyq. Alaıda, der kezinde boıymyzdy tiktep, jeńiske jettik.

- Buǵan deıin Qazaqstan ulttyq quramasyn «karlık» komandalardyń qataryna qosqan edińiz. Búgingi kezdesýden keıin pikirińiz ózgerdi me?

- Menińshe, Qazaqstan ulttyq quramasy San-Marıno, Lıýksembýrg, Lıhteınshteın syndy komandalarǵa qaraǵanda áldeqaıda qarymdyraq. Fızıkalyq jaǵynan da, tehnıkalyq jaǵynan da, tipti taktıkalyq jaǵynan da álgi ujymdardan ozyq. Bizge deıin de Qazaqstan quramasy jaqsy oınaǵan. Avstrııany upaıynan aıyryp, basqa komandalardy da biraz ábigerge saldy. Qorǵanysta da saýatty oınaı biledi. Óte jınaqy, birligi jarasqan komanda. Jigitterdiń de jigerlikterinde min joq.

- Al Qazaqstan quramasynyń qaı fýtbolshysyn bóle-jara atap óter edińiz?

- Jartylaı qorǵanystyń qos qaptalyn erekshe atap óter edim. Genrıh Shmıdtgal men Baýyrjan Jolshıev jaqsy oınady. Jalpy, Qazaqstan quramasynda qarymdy oıynshylar jeterlik eken.

- Ekinshi taımda ornyńyzdan birneshe ret turyp kettińiz. Jeńisten aırylyp qalamyz dep qoryqtyńyz ba?

- Joq, ol týraly múldem oılamadym. Jeńiske jeterimizge senimdi boldym. Biraq, bizdiń jigitter ekinshi taımda oılaǵandaryn iske asyra almaı jatty. Pastary da dittegen jerlerine jetpeı, shabýyldary da aıaqsyz qalyp jatty. Sony ýaıymdadym. Biraq úshinshi golymyz barlyǵyn óz ornyna qoıdy.

- Oıynnyń uıymdastyrylýy jaıly ne aıtasyz? Stadıonnyń atmosferasy qalaı eken?

- Túnniń qaı ýaǵynda bolmasyn, ulttyq komandasyna qoldaý bildirýge kelgen jankúıerlerge qaıranmyn, ári rıza bolyp otyrmyn. Al stadıon asa úlken emes. Sondyqtan, arenanyń qaı núktesinen bolmasyn jankúıerlerdiń qoldaýynan qulaq tundy.