Yntymaqtyń uıytqysy qazaq halqy bolýy qajet, al ózgeler onyń tóńiregine toptasýlary kerek - Asyly Osmanova
ASTANA. Qazannyń 26-sy. QazAqparat /Aıdar Ospanalıev/ - «Men Qazaqstan halqy Assambleıasy elimizdegi barlyq baılanystardyń uıytqysy bolsa eken dep armandaýshy edim. Óıtkeni Assambleıa Qazaqstandaǵy ózge ult ókilderiniń basyn biriktirip otyrǵan organ.
Qazaq memleketi, qazaq halqy Elbasy Nursultan Nazarbaev barlyq qamqorlyqty jasaǵannan keıin, ózge ult ókilderi de osyǵan jaýap retinde memleket qurýshy qazaq halqyna degen qurmetin kórsetip, memlekettik til retinde qazaq tilin bilýi jáne ony qasterleýi qajet». Bul týraly búgin Qazaqstan halqy Assambleıasynyń 15-shi sessııasynan soń jýrnalısterge suhbat bergen «Memlekettik tilge qurmet» respýblıkalyq birlestiginiń jetekshisi Asyly Osmanova málim etti, dep habarlaıdy QazAqparat.
Onyń sózine qaraǵanda, Assambleıanyń otyrysynda osy pikirge baılanysty kóterilgen máseleler shyn máninde júzege asatyn bolsa, Qazaqstannyń bolashaǵy jarqyn bolmaq. «Shyn máninde tek qazaq tilin bilgen adam ǵana qazaq degen halyqtyń jan-dúnıesin uǵynyp, túsine biledi. Sonda ǵana ol qazaq halqyn shyn syılaı alady. Bizdiń aramyzda syılastyq bolǵanda ǵana biz búgingiden de úlken jetistikterge jetemiz», dedi A.Osmanova.
Onyń aıtýynsha, álem búgin Qazaqstandy birligi men yntymaqtastyǵy arqyly tanyp otyr. Olaı bolsa, sol yntymaqtyń uıytqysy qazaq halqy bolýy kerek, al ózgeler onyń tóńiregine toptasýlary qajet.
