Yntymaqtastyqqa serpin beretin forým

Elbasy Qytaıǵa sapar barysynda aldymen Qytaı Halyq Respýblıka synyń tóraǵasy Sı Tszınpınmen kezdesti. Memleket basshysy QHR Tóraǵasyna «Bir beldeý, bir jol» forýmyna shaqyrǵany úshin alǵysyn bildirip, is-sharanyń jaqsy uıymdastyrylǵanyn atap ótti.

Forým búkil dúnıejúzi boıynsha bıylǵy eń basty oqıǵanyń birine aınaldy dep oılaımyn. Forýmnyń ashylýynda sóılegen sózińiz mazmundy boldy, ol elder arasyndaǵy yntymaqtastyqtyń kóp saýalyna jaýap berdi.

«Bir beldeý, bir jol» - jańa paradıgma, jańa deńgeıdegi yntymaqtastyq júıesi, - dedi Qazaqstan Prezıdenti.

Nursultan Nazarbaev «Bir beldeý, bir jol» ıdeıasynyń óńirlik deńgeıdegi yntymaqtastyqtyń ǵana emes, sonymen birge túrli qurlyq elderi arasyndaǵy ózara is-qımyldyń kórinisi ekenin aıtty.

«Bul beldeý jer shary turǵyndarynyń 45% quraıtyn 60-tan astam eldi qamtyp otyr. Qazaqstan men Qytaı Halyq Respýblıkasy arasyndaǵy ekijaqty jáne kópjaqty yntymaqtastyq úlgi alarlyqtaı boldy. Basqa elder bizden úırene alady», - dedi Memleket basshysy.

Qazaqstan Prezıdenti eki memleket arasyndaǵy yntymaqtastyqtyń qarqyndy damyp kele jatqanyn atap ótip, onyń budan da joǵary deńgeıde nyǵaıa túsetinine senim bildirdi. Sonymen qatar, taraptar óńirlik qaýipsizdik pen kıberqaýipsizdikti qamtamasyz etý máselelerin, sondaı-aq kún tártibindegi ózekti halyqaralyq máselelerdi talqylady.

Sı Tszınpın Qazaqstannyń Sırııa qaqtyǵysyn retteý protsesine qosqan úlesi úshin Nursultan Nazarbaevqa alǵys aıtty.

Qytaı Halyq Respýblıkasynyń tóraǵasy «Nurly jol» baǵdarlamasynyń tabystylyǵyn, sondaı-aq Azııadaǵy ózara is-qımyl jáne senim sharalary keńesiniń halyqaralyq bastamasynyń mańyzdylyǵyn atap ótti. Qytaı kóshbasshysy óziniń Qazaqstanǵa resmı saparmen kelip, Shanhaı yntymaqtastyq uıymynyń sammıtine jáne «EKSPO-2017» halyqaralyq mamandandyrylǵan kórmesiniń ashylýyna qatysýǵa daıyn ekenin aıtty.

Sondaı-aq, memleket basshylary ekijaqty yntymaqtastyq máselelerin talqylady. Taýar aınalymyn ulǵaıtý jáne ónerkásip, ınnovatsııa, kólik, energetıka salalaryndaǵy yntymaqtastyq taqyryptaryna erekshe kóńil aýdardy. Forým aıasynda ótken «Tyǵyz yntymaqtastyqqa arnalǵan saıası birlesken qyzmet» atty «dóńgelek ústel» jıynyna qatysýshylar aldynda sóz sóılegen Memleket basshysy Qytaı Halyq Respýblıkasynyń tóraǵasy Sı Tszınpınniń Eýrazııada ejelgi Jibek jolyn jańa, zamanaýı formatta qaıta jandandyrý ıdeıasy álemde beleń alyp kele jatqan saıası, ekonomıkalyq jáne gýmanıtarlyq daǵdarystarǵa berilgen ýaqytyly jaýap ekenin atap ótti.

Nursultan Nazarbaev Ortalyq Azııa álemniń eń iri naryqtary arasyndaǵy basty dánekerge aınalyp, qaıtadan strategııalyq mańyzǵa ıe bolǵanyn atap ótti.

Sonymen qatar, Qazaqstan Prezıdenti Eýrazııalyq ekonomıkalyq odaqtyń osy protsestegi mańyzdy róline toqtaldy. - «Úlken Eýrazııanyń» birtutas ekonomıkalyq keńistigin qurý ıdeıasy jańa mánge ıe bolýda. Jibek jolynyń ekonomıkalyq beldeýi Shanhaı yntymaqtastyq uıymy, Eýrazııalyq ekonomıkalyq odaq jáne Eýropalyq odaq platformalaryn órkendeýdiń birtutas óńirlik aýmaǵyna utymdy túrde toǵystyra alady, - dedi Memleket basshysy. Nursultan Nazarbaev «Bir beldeý, bir jol» bastamasyn iske asyrý jóninde birqatar naqty usynystaryn bildirdi.

«Jibek joly ekonomıkalyq beldeýiniń tranzıttik áleýetin tıimdi ıgerý úshin qyzmet kórsetý deńgeıin jaqsartyp, ákimshilik kedergilerdi joıý arqyly taýar aǵynyn ótkizýdi birte-birte jeńildetý qajet. Qazaqstan bul másele boıynsha naqty sharalar qabyldaýda. Ol saraptama men tıisti qarjylandyrýdy talap etedi. Azııa ınfraqurylymdyq ınvestıtsııalar banki osyndaı baǵdarlamalardy belsendi túrde qarjylandyrý kerek dep esepteımin. Bul - bolashaqqa arnalǵan ınvestıtsııa», - dedi Qazaqstan Prezıdenti.

Budan bólek, Memleket basshysy jańa Jibek joly boıynda ornalasqan elderdiń azyq-túlik qaýipsizdigin qamtamasyz etý maqsatymen aýyl sharýashylyǵy kooperatsııasyn damytýdyń mańyzdylyǵyn atap ótti.

Sondaı-aq Nursultan Nazarbaev ınnovatsııalyq jáne ǵylymı-tehnıkalyq damý salasyndaǵy yntymaqtastyqty tereńdetýdi usyndy.