Yntymaǵy men birligi jarasqan elde ómir súrip jatyrmyz – QHA músheleri

ALMATY. QazAqparat- Almatyda Alǵys aıtý kúnine arnalǵan onlaın brıfıng ótti. Brıfıng barysynda «Qazaqstan uıǵyrlarynyń respýblıkalyq etnomádenı ortalyǵy» qoǵamdyq birlestiginiń Almaty qalasyndaǵy fılıalynyń tóraǵasy Abaıdýlla Japarov pen orys etnomádenı ortalyǵynyń tóraǵasy Vsevolod Lýkashev Qazaqstan halqy Assambleıasynyń atynan Alǵys aıtý kúnimen quttyqtady, dep habarlaıdy QazAqparat tilshisi.

Jıyn barysynda Vsevolod Lýkashev bul kún adamdardyń bir-birine kómektesip, qaıyrymdy is jasaýǵa shaqyratyn data ekenin jetkizdi.

«Bul merekeniń maqsaty-qoǵamnyń toptasýyn, azamattyq beıbitshilikti, qoǵamdyq kelisimdi kórsetý, ortaq tarıh negizinde qazaqstandyq biregeılik pen birlikti nyǵaıtý. Bul rýhanı kún. Adamdardyń bir-birine kómektesip, qaıyrymdy is jasaýyna shaqyratyn kún. Almatynyń búgingi shýaqty kúninde qala turǵyndaryn aıtýly merekemen quttyqtaımyn. Onyń ústine búgin Qazaqstan halyqtary assambleıasynyń qurylǵan kúni. Elimiz qazirgi pandemııalyq qıyndyqty eńsere bersin jáne ultaralyq kelisim nyǵaıa berýin tileımin», - dedi Vsevolod Lýkashev.

«Qazaqstan uıǵyrlarynyń respýblıkalyq etnomádenı ortalyǵy» qoǵamdyq birlestiginiń Almaty qalasyndaǵy fılıalynyń tóraǵasy Abaıdýlla Japarov ta Qazaqstan halqyn búgingi Alǵys aıtý kúnimen quttyqtady.

«Alǵys aıtý kúni-bul elimizdiń barlyq azamattarynyń bir-birine degen qurmetin taǵy bir ret kórsetý múmkindigi, ortaq tarıhymyzdy qurmetteý kúni, ózara kómek, qoldaý jáne jaýapkershilik kúni. Kóktemniń alǵashqy kúni Alǵys aıtý kúni elimizdiń basty baılyǵy - halyq birligin odan ári saqtaýǵa jáne kóbeıtýge yqpal etsin», - dedi Abaıdolla Japarov.

Aıta keteıik, Qazaqstanda QR Tuńǵysh Prezıdenti - Elbasy Nursultan Nazarbaev bastamasymen Alǵys aıtý kúni 2016 jyldan bastap merekelenýde.