Yqpaldy kandıdattar ótip jatsa, oń ózgerister bolady – Aıda Balaeva

ASTANA. QazAqparat – QR Prezıdenti Ákimshiligi basshysynyń orynbasary Aıda Balaeva búgingi saıası naýqanǵa qatysty oıymen bólisti, dep habarlaıdy QazAqparat tilshisi.

«Ózgeristi ár azamat ózinen bastaýy kerek. Azamattardyń saılaýǵa kelip óz tańdaýyn jasaýy el damýyna nemquraıdylyq tanytpaýdyń belgisi. Kandıdattardyń belsendiligin kórip otyrmyz. Yqpaldy kandıdattar ótip jatsa, menińshe, oń ózgerister bolady. Jan-jaqty, onyń ishinde qoǵam ózgerýi tıis. Halyqaralyq baıqaýshylardyń da qyzyǵýshylyǵy artyp keledi. 2019 jyly biren-saran shetel baıqaýshylary bolsa, qazir olardyń sany artqan. Olar saılaýdyń ashyq ári ádil ótýine yqpalyn tıgizip jatyr. Qoǵamda bolyp jatqan ózgerister meni qýantady», – dedi Aıda Balaeva saılaýda daýys bergennen keıin BAQ ókilderiniń saýalyna jaýap bere turyp.

Onyń aıtýynsha, osy jolǵy saılaýda saıası partııalar asa belsendilik tanytýda.

«Saılaýdan úzdik nátıje kútemiz. Májilis jáne máslıhattar depýtattary saılaýy alǵash ret aralas júıe boıynsha ótip jatyr. Bul saıası partııalardyń jandanýyna yqpal etti. Saıası báseke, azamattyq qoǵamnyń belsendiligi baıqalady. Sonyń ishinde jaı baqylap qana qoımaı, saılaý protsesine qatysatyn azamattyq belsendilerdi kórip otyrmyz. Bul shyn máninde kásibı parlamentti qalyptastyrýǵa yqpal etedi», - deıdi Prezıdent ákimshiligi basshysynyń orynbasary.

Aıta keteıik, QR Prezıdenti Ákimshiligi basshysynyń orynbasary Aıda Balaeva óz tańdaýyn elordadaǵy №111 saılaý ýchaskesinde jasady.