Yqpaldasqannyń yrysy mol – Sholpan Qydyrnııazova

ORAL. QazAqparat – Yntymaǵy mol elden yrys ketpeıdi. Bul týraly belgili aıtys aqyny, til janashyry, Qazaqstannyń eńbek sińirgen mádenıet qyzmetkeri, «Qurmet» ordeniniń ıegeri Sholpan Qydyrnııazova málim etti, dep habarlaıdy QazAqparat tilshisi.

Onyń aıtýynsha, QR Prezıdenti Qasym-Jomart Toqaev Ulttyq qoǵamdyq senim keńesiniń ekinshi otyrysynda taıǵa tańba basqandaı etip tapsyrma berdi.

«Halyqtan joǵary jáne halyqtan bıik turǵan eshkim de, eshteńe de joq». Budan asyp ne aıtýǵa bolady? «Ornyqty oı, oryndy sóz tyndyrymdy iske tetik bolar, - » degen sózben tárbıelengen urpaqpyz. Yqpaldasqannyń yrysy mol, yryldasqannyń urysy mol, tartynshaqtyń turysy mol. Bul - tatýlyqqa bastaý, dúrdarazdyqty tastaý, qaryshty qadamǵa úndeıtin úrdis, ulttyq ustanym.

«Oqydym, oılandym, zeınetker zerdesimen uqqanym: úlken - úlgi, kishi - úmit, áreket - ádep, halyq - qamal, bılik - betburys, aqıqat - amal. Egemen eldiń erteńi eńseli, keleshegi kórkem, bolashaǵy boljaýly bolýy úshin taǵy bir sanany silkigen sózden serpin alyp, senimmen iske asyrýǵa atsalysýymyz kerek. Maqsat aıqyn, mindet mańyzdy. Aqyldasqan adaspas. Ulttyq qoǵamdyq senim keńesi týraly áleýmettik jelilegi jaǵymsyz jeldeı uıtqyǵan san alýan pikirtalasqa da jaýap tabyldy. Ashynǵan ana, retsiz reformalaýdan shashylǵan sana, taltaıǵan tártip, shalqaıǵan sheneýnik, ópirim óreskeldik, buıdasyz buzaqylyq, júgensiz jónsizdik, tildik tańba, zerdeleıtin Zań máseleleri aınalasyndaǵy sheshimin tappaı kelgen keıbir keleńsizdiktiń aldyn alý joldary aıqyn aıtyldy. Sózden iske kóshetin ýaqyt keldi. Árkim ózine júktelgen mindetti memlekettik múddege saı minsiz oryndasa bolǵany. Artyq qylamyn dep tyrtyq qylmasyn. Birligimiz bútin, tirligimiz tutas bolsyn», dedi QazAqparat tilshisine Sholpan Batyrqyzy.

Eske sala keteıik, budan buryn halyqtyń únine qulaq asqan utatynyn jazǵan bolatynbyz.