Ieppe Hýldahl : Hole-in-one soqqysy úshin osyndaı keremet syılyq alam dep oılamappyn
ALMATY. QazAqparat- Hole-in-one soqqysy úshin osyndaı keremet syılyq alam dep oılamappyn. Bul men úshin tamasha tosynsyı boldy. Qýanyshtan basym aınaldy. «QazAqparat» tilshisine bergen suhbatynda halyqaralyq «Qazaqstan oýpen» golf-týrnırinde eki Hole-in-one soqysynyń biriniń avtory 33 jastaǵy danııalyq kásipqoı golfshy Ieppe Hýldahl osyndaı áserde bolǵanyn jetkizdi.
«Bul kún esten tanarlyqtaı kún boldy. Biz barlyǵymyz fınaldyq kezeńge ótýge kúsh saldyq. Men óttim. Shynymdy aıtsam, men Hole-in-one soǵamyn dep oılaǵan joqpyn. Biraq ár golfshy osyndaı soqqy jasaýdy armandaıtyny jasyryn emes. Men osydan 12-13 jyl buryn Eýropada bir emes, eki hole-in-one soqqysyn jasaǵanmyn. Birin 170 metrden, ekinshisin 120 metrde jerden saldym. Biraq olarǵa syılyq berilgen emes. Al búgin myna syılyqtardy kórip, tóbem kókke jetkendeı boldy. Úıge habarlasyp jaqsy jańalyǵymmen bólistim. Úı-ishim qýanyp jatyr. Meniń áıelim jáne eki kishkentaı qyzym bar», - dedi I. Hýldahl.
Sonymen qatar, ol golfpen alty jasynan bastap aınalysa bastaǵanyn jetkizdi.
«Meniń golfpen aınalysyp kele jatqanyma bıyl 27 jyl boldy. Kopengagen qalasyna jaqyn mańda turamyn. Onda golf alańy bolatyn. Qazir de bar. Alty jasymda ákem meni sol golf alańyna alyp barǵany esimde. Men bul oıyndy qatty unattym. Sodan beri golfpen turaqty aınalysyp kelemin. Qazir kásipqoı golfshymyn. Basqa áýestigim joq. Olarǵa ýaqyt ta jetpeıdi. Qolym tıse, qyzdarymdy oınatqandy unatamyn. Al golf - meniń ómirlik kásibim. Munda psıhologılyq turaqtylyq úlken mańyzǵa ıe. Óıtkeni, syrttaı jeńil oıyn bolyp kóringenimen, onda kedergiler shash-etekten. Sondyqtan, ózińe senimdi bolyp, olardyń barlyǵyna shydaı bilý kerek» , - dedi I. Hýldahl.
Aıta ketelik, ol «Qazaqstan oýpen» golf-týrnırine osymen tórtinshi ret qatysyp jatyr eken. Buǵan deıin jeńimpaz bolmaǵanymen, alǵashqy ondyqqa enip júrgen.
Taǵy da esterińizge sala ketelik, keshe 11-shi Halyqaralyq «Kazakhstan Open-2015 golf týrnırinde tarıhı ýaqıǵa oryn alǵan bolatyn. Onda qatarynan bir emes, eki hole-in-one soǵyldy. Danııalyq golfshy Ieppe Hýldahl birinshi alańqaıda golf dobyn uıashyqqa 148 metrden, al 10 mınýt óter-ótpesten gollandııalyq Maarten Lafebr 16-shy alańqaıdan 169 metr jerden bir soqqymen saldy.
Ieppe Hýldahlǵa «Merkýr Avto» kompanııasy atynan Audi A4 markaly avtokóligi men 106 740 dollar turatyn Parrelet Tourbillion saǵaty, al Maarten Lafebrge sáıkesinshe Audi A6 markaly avtokóligi men Parrelet Tourbillion saǵaty saltanatty jaǵdaıda tabys etildi.
