Iens Stoltenberg NATO bas hatshysynyń ókilettigin Mark Rıýttege resmı túrde tapsyrdy

ASTANA. KAZINFORM – Búgin NATO-nyń Belgııadaǵy shtab-páterinde burynǵy bas hatshy Iens Stoltenbergten Mark Rıýttege ókilettikterdi tapsyrýdyń resmı rásimi ótti.

Dúısenbide NATO-nyń Áskerı komıteti bas hatshy qyzmetindegi ókilettiligi aıaqtalyp qalǵan I.Stoltenbergpen resmı túrde qoshtasty. Onyń ornyna qyzmetke Nıderlandtyń burynǵy premer-mınıstri Mark Rıýtte keledi. 

Uıymnyń málimdemesinde atap ótilgendeı, NATO tarıhyndaǵy eń uzaq qyzmet etken ekinshi Bas hatshy Iens Stoltenberg Alıans tarıhyndaǵy eń alasapyran jyldarǵa kýá boldy.

«NATO qazir burynǵydan da úlken, kúshti jáne kez kelgen synaqqa tótep berýge daıyn. Men úshin bas hatshy qyzmetin atqarý jáne Áskerı komıtetpen, NATO-nyń shtab bastyqtarymen jáne áskerı ókildermen tyǵyz jumys isteý naǵyz mártebe boldy. Otstavkaǵa shyǵý qanshalyqty muńdy bolsa da, NATO-nyń turaqtylyǵy men kúshi jeke adamdarǵa emes, ujymǵa baılanysty», - dedi Iens Stoltenberg. 

Stoltenberg NATO bas hatshysy qyzmetinen ketkennen keıin ne bolatyny buǵan deıin habarlanǵan bolatyn.