Iemenniń búkil óńirinde tyrysqaq indeti órship tur

ASTANA. KAZINFORM — Iemendegi gýmanıtarlyq kómek toqtap turǵan kezde tyrysqaq aýrýy el óńiriniń 96 paıyzynda tirkeldi, dep habarlaıdy The Washington Post medıtsına qyzmetkerleri men sarapshylarǵa silteme jasap. 

Dúnıejúzilik densaýlyq saqtaý uıymynyń Iemendegi keńsesi basshysynyń orynbasary Nýha Mahmýd basylymǵa tyrysqaq indeti «álemdegi eń qorqynyshtysy» dedi. Onyń aıtýynsha, osy jyldyń qańtarynan shilde aıynyń ortasyna deıin elde tyrysqaq aýrýynyń 50 myń jaǵdaıy anyqtalyp, 149 adam qaıtys bolǵan.

— Mundaı daǵdarysqa birinshi ret tap bolyp otyrmyz. Buryn biz onymen kúrese alatyn edik, biraq jaqynda tyrysqaq búkil elge tarady, - dep Iemendegi dárigerlerdiń biri.

Sheteldik kómek kóleminiń qysqarýy dári-dármek pen medıtsınalyq qural-jabdyqtardyń tapshylyǵyna ákeldi. Nátıjesinde Iemendegi barlyq aýrýhananyń úshten biri jumysyn toqtatty. BUU málimeti boıynsha, el halqynyń 80 paıyzy syrtqy kómekke táýeldi.

Basylym qazirgi tarıhtaǵy eń iri tyrysqaq indeti Iemende 2016-2022 jyldary baıqalǵanyn, osy ýaqyt ishinde elde tyrysqaq aýrýynyń 2,5 mıllıonǵa jýyq jaǵdaıy tirkelgenin eske salady.

Aqparat úshin aıta keteıik, tyrysqaq – adamnan-adamǵa juǵatyn jiti ishek juqpaly aýrýy. Tyrysqaq basqa jiti ishek aýrýlarynan klınıkalyq aǵymynyń aýyrlyǵymen, joǵary ólim-jitimimen jáne salystyrmaly túrde qysqa merzimde aýqymdy aýmaqtarǵa taralyp, halyqtyń kópshiligine juqtyrý múmkindigimen erekshelenedi.

Tyrysqaqqa kúdik týdyrýǵa negiz bolatyn kelesi belgiler: qyzba (temperatýra – 37°S jáne odan joǵary), júrek aıný, ish ótý, qusý, bas aýrýy, sonymen birge tyrysqaq boıynsha qolaısyz elderden ákelinýin eskerý qajet.

Eske sala keteıik, Nıgerııada tyrysqaq indetinen 8 adam kóz jumdy.