Iemendik hýsıtter Qyzyl teńizdegi Izraıl kemelerine taǵy da shabýyl jasamaq

ASTANA. KAZINFORM – Iemendik hýsıtter Izraıl porttaryna baratyn kemelerge olardyń qoly jetetin kez kelgen aımaqta shabýyl jasaýǵa ýáde berdi. Bul týraly ıAhıa Sarı tobynyń áskerı ókili telearnada málimdedi.

«Biz Jerorta teńizindegi Izraıl porttaryna baratyn kez kelgen kemelerge, kez kelgen aımaqtan shabýyl jasaımyz», - dep batyl málimdeme jasady Sarı.

Ol sondaı-aq bul áreket habarlama jarııalanǵan sátten bastap birden oryndalatynyn aıtty. 

Qarasha aıynan beri Iemenniń «Ansar Allah» qozǵalysy, ıaǵnı, hýsıtter qozǵalysy retinde Qyzyl teńizde, Bab ál-Mandab buǵazynda jáne Aden shyǵanaǵynda kemelerge qarsy birneshe ret zymyran jáne ushaq shabýyldaryn jasady. Hýsıler óz shabýyldaryn palestınalyqtarmen yntymaqtastyq naýqany jáne Izraıldiń Gaza sektorynda júrgizip jatqan soǵysyna narazylyq dep ataıdy. 

Bul sheshimniń sebepteriniń biri retinde Sarı qazir 1,5 mıllıonnan astam palestınalyqtar panalaıtyn Gaza sektorynyń ońtústigindegi Rafah qalasynda kele jatqan «agressıvti áskerı operatsııany» atady. 

Izraıl premer-mınıstri Bınıamın Netanıahý kún saıyn bombalanyp jatqan Rafahqa qurlyq áskerin jiberemiz dep qorqytty. Izraıldiń qurlyqtaǵy yqtımal shabýyly halyqaralyq narazylyq týdyrdy. Kóptegen memleket, sonyń ishinde Amerıka Qurama Shtattary, Izraıl úkimetin shabýyl jasamaýǵa shaqyrdy.

Kelissózder barysynda áli de kúrdeli kedergiler bar. HAMAS turaqty atysty toqtatýǵa, Izraıl áskerleriniń Gaza sektorynan tolyq shyǵarylýyna jáne qonys aýdarǵan palestınalyqtardyń úılerine kedergisiz oralýyna kepildik bermeıtin kelisimdi qabyldamaıtynyn birneshe ret málimdedi.