Iemendegi hýsıtter Izraılge alǵash ret zymyranmen soqqy jasady

ASTANA. KAZINFORM – Iemendegi hýsıtter AQSh pen Izraıldiń Iranmen qaqtyǵysy bastalǵaly beri alǵash ret Izraıl aýmaǵyna zymyranmen soqqy jasady, dep habarlaıdy Anadolý.

Izraıl armııasynyń málimetinshe, Iran qoldaıtyn hýsıtter Iemen aýmaǵynan zymyran ushyrǵan. Zymyran ashyq jerge qulaǵan.

Izraıldik BAQ-tyń habarlaýynsha, zymyran soqqysyna baılanysty eldiń ortalyq bóliginde, ásirese Tel-Avıv qalasynda áýe dabyly qosylǵan.

Qyzyl Davıd juldyzy jedel qyzmeti taratqan aqparatqa sáıkes, aldyn ala derekter boıynsha, zardap shekkender men qaza tapqandar joq.

Anadolý agenttigi hýsıtter Izraılge alǵashqy soqqyny 28 naýryzda jasaǵanyn jazady. Bul Iranǵa qarsy shabýyldar bastalǵannan keıingi alǵashqy áreket retinde baǵalanyp otyr.

Hýsıtterdiń áskerı ókili ıAhıa Serı bul jóninde málimdeme jasap, qozǵalystyń AQSh pen Izraılge qarsy soǵysqa qosylǵanyn málimdedi.

– Biz alǵashqy áskerı operatsııalardy júzege asyryp, okkýpatsııalanǵan Palestınanyń ońtústigindegi mańyzdy áskerı nysandarǵa ballıstıkalyq zymyrandarmen soqqy jasadyq, – dedi ol.

Buǵan deıin Iranmen soǵysta AQSh-tyń 365 áskerı qyzmetkeri zardap shekkeni habarlaǵan bolatyn.