Iemende joıqyn sý tasqynynan 150-den astam adam qaza tapty

ASTANA. KAZINFORM – 1 qyrkúıektegi jaǵdaı boıynsha Iemenniń birneshe provıntsııasynda qatty sý tasqyny caldarynan 150-den astam adam qaza taýyp, myńdaǵan turǵyn úılerin tastap ketýge májbúr boldy, dep habarlaıdy Sınhýa aqparat agenttigi.

Bul týraly ıemendik derekkóz jáne BUU Bosqyndar isi jónindegi Joǵarǵy komıssar basqarmasy habarlady.

Ruqsattyń joqtyǵyna baılanysty aty-jónin atamaýdy ótingen hýsıtterdiń densaýlyq saqtaý qyzmetkeri Iemendegi nóser jaýyn men sý tasqynynan 152 adamnyń qaza tapqanyn habarlady. 

Onyń aıtýynsha, 27 tamyz kúni keshke eldiń soltústik-batysyndaǵy El-Mahvıt provıntsııasynda tolassyz jaýǵan jańbyr men bógettiń buzylýy saldarynan 40-qa jýyq adam qaza tapqan.

Sondaı-aq 30 tamyzda Iemenniń batysyndaǵy hýsıtter baqylaýyndaǵy Damar provıntsııasynda sý tasqynynan taǵy 28 adamnyń qaza tapqany habarlandy.

Derekkózdiń habarlaýynsha, hýsıtter baqylaıtyn Hodeıda provıntsııasy tamyz aıynyń basynan beri eń qatty zardap shekti – munda 84 adam qaza taýyp, taǵy 25 adam jaraqat aldy. 

Habarlanǵandaı, shildeniń ortasynda bastalǵan sý tasqynynan Iemenniń kóptegen aımaqtary, ásirese batys jáne soltústik-batys provıntsııalary zardap shekken. 

Ál-Mahvıt provıntsııasynyń batysyndaǵy Malhan aýdanynda ǵana 56 myńnan astam úı búlinip,1 myńnan astam otbasy evakýatsııalanýǵa májbúr boldy.

Sý tasqyny sonymen qatar ınfraqurylymǵa aıtarlyqtaı zııan keltirdi, keń egistik jerlerdi sý basty, joldar jabyldy. 

Bul tabıǵı apat Iemendegi azamattyq soǵystan qatty qıraǵan gýmanıtarlyq daǵdarysty odan ári qıyndatty.