Iemende jalpy mobılızatsııa jarııalandy
ASTANA. KAZINFORM – Iemen Ókilder palatasy hýsıtter tarapynan shıelenistiń kúsheıýine baılanysty jalpy mobılızatsııa jarııalaýdy maquldady, dep habarlaıdy Kazinform memlekettik SABA aqparat agenttigine silteme jasap.
Sheshim parlament spıkeri Sultan ál-Barakanıdiń tóraǵalyǵymen beınekonferentsııa formatynda ótken parlamenttiń keńeıtilgen otyrysynda qabyldandy.
Buǵan deıin Prezıdenttik basqarý keńesiniń tóraǵasy, Iemen Qarýly kúshteriniń Joǵarǵy bas qolbasshysy Rıshad ál-Alımı jalpy mobılızatsııa jarııalaýdy suraǵan bolatyn.
SABA habarlaǵandaı, sheshim beıbit turǵyndardy, respýblıkalyq qurylysty jáne konstıtýtsııalyq zańdylyqty, sondaı-aq eldiń egemendigi men aýmaqtyq tutastyǵyn qorǵaý maqsatynda qabyldandy.
Jalpy mobılızatsııa Iemen Konstıtýtsııasy men qoldanystaǵy zańnamasyna sáıkes júrgiziledi. Sheshim jarııalanǵan sátten bastap kúshine enedi jáne ony qabyldaýǵa negiz bolǵan jaǵdaılar toqtaǵanǵa deıin qoldanylady.
Parlament saıası kúshterdi ulttyq birlikke jáne is-qımyldardy úılestirýge shaqyrdy. Sonymen qatar depýtattar Saýd Arabııasy bastaǵan Arab koalıtsııasyn qoldaıtynyn taǵy da málimdedi.
Buǵan deıin hýsıtter koroldik aýmaǵyna birqatar zymyran jáne ushqyshsyz ushý apparattary arqyly soqqy jasaǵany, al Saýd Arabııasy Iemenge áýeden soqqy bergeni habarlanǵan bolatyn.
Er-Rııad qoldaıtyn Iemenniń halyqaralyq deńgeıde moıyndalǵan úkimetiniń kúshteri Bab-el-Mandeb buǵazy aýdanyndaǵy mańyzdy pozıtsııalarǵa baqylaýdy joǵaltty.
Iemende 2022 jyly qalyptasqan birneshe jyldyq salystyrmaly tynyshtyqtan keıin áskerı qımyldar qaıta bastaldy.
