Iemende sý tasqynynan jeti adam qaza tapty
ASTANA. KAZINFORM — Iemende nóser jaýyn men tasqynnan jeti adam qaza tapty, olardyń beseýi – balalar, dep habarlaıdy Anadoly.
Iemende qatty nóser jaýyn men sý tasqyny saldarynan tórt provıntsııada qaza tapqandar sany jeti adamǵa jetti, olardyń beseýi – balalar.
Jergilikti bıliktiń derekterine sáıkes, tabıǵı apattan eń kóp zardap shekken óńirler – Shabýa, Hadramaýt, Lahdj jáne Haddja provıntsııalary.
Lahdj provıntsııasynyń Týben aýdanynda tasqyn bir adamnyń ómirin qıdy. Taǵy bes adamdy sýdan qutqardy, olardyń kólikteri sý astynda qalǵan. Sondaı-aq birneshe úıdiń qıraǵany habarlandy.
Iemen Іshki ister mınıstrliginiń málimetinshe, Shabýa men Hadramaýt provıntsııalarynda eki bala men taǵy bir adam sý tasqyny kezinde mert bolǵan.
Buǵan deıin hýsıtterdiń baqylaýyndaǵy «26 September Net» saıty Haddja provıntsııasynda úsh balanyń qaza tapqanyn jáne bir úıdiń qıratylǵanyn habarlaǵan bolatyn.
Eldiń meteorologııalyq jáne erte eskertý ortalyǵy aldaǵy saǵattarda da qatty jaýyn-shashynnyń jalǵasatynyn eskertti.
Aıta ketelik Iemen jaǵalaýynda 76 mıgrant qaza tapqan edi.