Iemende qaqtyǵys órshigeli beri 1000-ǵa jýyq adam qaza tapty
ASTANA. KAZINFORM — Iemende qaqtyǵys ýshyqqaly beri 1000-ǵa jýyq adam qaza taýyp, 4200-den astamy jaralanǵan. 198 myńǵa jýyq turǵyn baspanasyn tastap ketýge májbúr boldy, dep habarlaıdy Kazinform Anadolu agenttigine silteme jasap.
Dúnıejúzilik densaýlyq saqtaý uıymynyń bas dırektory Tedros Adhanom Gebreıesýs Iemendegi qaqtyǵystyń kúsheıýi halyqqa ońaı soqpaǵanyn aıtty.
— Qaqtyǵys ýshyqqaly beri tyrysqaq pen qyzylsha indeti de órship, 1000-ǵa jýyq adam qaza tapty, 4200-den astamy jaralandy. 198 myńǵa jýyq adam baspanasyn tastap ketýge májbúr boldy, — dep habarlady DDSU basshysy X áleýmettik jelisindegi paraqshasynda.
The escalating conflict in #Yemen is taking a devastating toll. Nearly 1000 people have been killed, more than 4200 injured and almost 198,000 displaced since the latest escalation, amid outbreaks of cholera and measles. @WHO’s immediate funding requirement has more than tripled, from $9 million to $31 million, to keep pace with growing needs. We urgently call on donors to step up: https://t.co/F1gYZoJgXV Lives depend on humanitarian and health aid.
— Tedros Adhanom Ghebreyesus (@DrTedros) October 6, 2026
Onyń sózinshe, qajettiliktiń artýyna baılanysty DDSU-ǵa kerek qarjy kólemi úsh eseden astam ósip, 9 mıllıon dollardan 31 mıllıon dollarǵa deıin jetken. Bul shamamen 4,1 mıllıard teńgeden 14,1 mıllıard teńgege deıingi qarajat.
— Adamdardyń ómiri gýmanıtarlyq jáne medıtsınalyq kómekke táýeldi, — dedi Gebreıesýs donorlardy shuǵyl shara qabyldaýǵa shaqyryp.
Keıingi kezde Iemendegi Iran qoldaıtyn hýsıtter men úkimet kúshteri arasyndaǵy qaqtyǵystar Taız jáne Bab-el-Mandeb buǵazy mańynda kúsheıe tústi.
Úkimet hýsıtterdiń alǵa jyljýyna tosqaýyl qoıý úshin «Iemen tańy» operatsııasyn qolǵa aldy. Saýd Arabııasy bastaǵan arab koalıtsııasy operatsııaǵa áýe kúshteri arqyly qoldaý kórsetip otyr.
Eske sala keteıik, Iemen hýsıtterdiń kútpegen shabýylynan keıin Taıaý Shyǵystaǵy mańyzdy elderdiń birine aınaldy. Olar Bab-el-Mandeb buǵazyna jaqyndap, álemdik saýda úshin mańyzdy teńiz jolyna qaýip tóndirdi. Endi Saýd Arabııasy qoldaıtyn Iemen úkimeti joǵaltqan aýmaqtaryn qaıtarý úshin qarsy shabýylǵa kiristi. Hýsıtter ońtústikte qalaısha tez ilgeriledi jáne Er-Rııadtyń jaýaby qanshalyqty aýqymdy bolýy múmkin? Bul máselege Kazinform halyqaralyq sholýshysy taldaý jasady.
Buǵan deıin Iemen parlamenti jappaı mobılızatsııa jarııalaýdy maquldaǵanyn habarlaǵan edik. Bul sheshim beıbit turǵyndardy, respýblıkalyq qurylys pen konstıtýtsııalyq tártipti, sondaı-aq eldiń egemendigi men aýmaqtyq tutastyǵyn qorǵaý maqsatynda qabyldandy.
