Iemende hýsıtterdiń shabýylynan 58 adam qaza tapty
ASTANA. KAZINFORM — Iemende hýsıtter men halyqaralyq deńgeıde moıyndalǵan úkimet kúshteri arasyndaǵy qarýly teketires kúsheıip, qaza tapqandar sany artyp keledi. Taraptar arasyndaǵy qaqtyǵys shıelenisip tur.
Iemenniń ońtústigindegi Shabýa provıntsııasynda dúısenbi kúni hýsıtterdiń úkimettik qaýipsizdik kúshteriniń oqý-jattyǵý lagerine jasaǵan zymyran soqqysynan 58 adam qaza taýyp, 200-den astamy jaraqat aldy. Budan bólek taǵy 14 adam habar-osharsyz ketti. Bul týraly provıntsııa gýbernatory Avad ál-Vazır málimdedi, dep habarlaıdy Reuters agenttigi.
Jergilikti bılik ókilderiniń málimetinshe, hýsıtter oqý-jattyǵý sabaqtary ótip jatqan kezde Djardan aýdanyndaǵy Ál-Alam lagerine úsh ballıstıkalyq zymyran ushyrǵan.
Shabýyl kezinde lager aýmaǵynda polıtsııa men ishki qaýipsizdik kúshteriniń qataryna qosylý úshin arnaıy daıarlyqtan ótip jatqan jańa sarbazdar bolǵan.
A Houthi attack on a Yemeni military training camp killed over 50 people and injured more than 200 injured in Yemen's Shabwa province on Monday, marking the deadliest attack in weeks of the war between Ansar Allah and Yemeni government-aligned forces. https://t.co/74ESJ0hJIP
— Middle East Eye (@MiddleEastEye) October 19, 2026
The Guardian basylymynyń habarlaýynsha, zardap shekkender provıntsııanyń ákimshilik ortalyǵy Atak qalasyndaǵy aýrýhanalarǵa jetkizilgen. Jaralanǵandardyń kóp bolýyna baılanysty medıtsınalyq mekemelerde donorlyq qan tapshylyǵy týyndap, aýyr haldegi naýqastardyń bir bóligi kórshiles Hadramaýt pen Aden provıntsııalaryndaǵy medıtsınalyq mekemelerge aýystyrylǵan.
Iemen Prezıdenttik basqarý keńesiniń tóraǵasy Rashad ál-Alımı shabýyldy qatań aıyptap, oǵan tıisti jaýap qaıtarylatynyn aıtty. Onyń sózinshe, qaza tapqandar qaýipsizdik organdarynda qyzmet etýge daıarlanyp jatqan jasaq quramynda bolǵan.
— Jas sarbazdarǵa shabýyl jasaý hýsıtterdiń qysymǵa tap bolǵan saıyn terrorlyq áreketterge baratynyn kórsetedi, — dedi ol.
Iemenniń aqparat mınıstri Mýammar ál-Irıanı bul soqqyny áskerı qylmys dep atap, nysan ishki qaýipsizdik kúshterin daıarlaýǵa arnalǵanyn jáne qazirgi urys qımyldaryna tikeleı qatysy joq ekenin málimdedi.
Hýsıtter soqqy jasaǵanyn rastaǵanymen, nysannyń maqsatyn basqasha túsindirdi. Qozǵalystyń áskerı ókili ıAhıa Sarıdiń aıtýynsha, lagerde Saýd Arabııasy qoldaıtyn kúshter shoǵyrlanǵan.
استهدفت قواتنا المسلحة تحشيدات العدو السعودي في معسكر العلم الذي يديره ضباط سعوديون في المناطق الشرقية. أسفر الاستهداف عن سقوط عشرات القتلى والجرحى من تحشيدات العدو السعودي بينهم ضباط سعوديون. نحذر المخدوعين من الاستجابة لدعوات العدو السعودي لاستجلابهم بأمواله المدنسة إلى محارق الموت، واسترخاصهم بدلا عن جنوده غير مكترث بحياتهم.
— العميد/ يحيى سريع (@Yah_Saree) October 19, 2026
Onyń sózinshe, nysandy saýdııalyq ofıtserler basqarǵan. Olardyń arasynda da qaza tapqandar men jaralanǵandar bar. Saýd Arabııasynyń bıligi bul málimdemege qatysty ázirge pikir bildirmedi.
Qyrkúıektiń basynan beri bul Iemendegi eń kóp adam qaza tapqan shabýyl boldy.
Qaqtyǵys hýsıtterdiń Qyzyl teńiz jaǵalaýy arqyly strategııalyq mańyzy bar Bab-ál-Mandeb buǵazyna qaraı shabýylyn kúsheıtýinen keıin órshı tústi. Buǵan jaýap retinde Saýd Arabııasy qoldaǵan úkimettik kúshter hýsıtter baqylaýyndaǵy aýmaqtardy qaıtarý maqsatynda «Iemen tańy» operatsııasyn bastap, qarsy shabýylǵa kóshti.
Bab-ál-Mandeb buǵazy mańynda, sondaı-aq Taız, Marıb jáne ál-Djaýf provıntsııalarynda keskilesken shaıqastar júrip jatyr. Hýsıtter Taız qalasyn oqshaýlaýǵa kúsh salyp, Saýd Arabııasynyń áýejaılary, munaı nysandary men áskerı bazalaryna zymyrandarmen jáne drondarmen shabýyl jasap jatyr.
BBC málimetinshe, qazan aıynyń basynan beri hýsıtterdiń Saýd Arabııasynyń áýejaılaryna jasaǵan shabýyldarynan keminde 19 adam qaza tapqan. Al hýsıtter baqylaýyndaǵy Densaýlyq saqtaý mınıstrliginiń habarlaýynsha, sońǵy jeti aptada Saýd Arabııasynyń soqqylarynan 141 adam kóz jumǵan.
Iemenniń halyqaralyq deńgeıde moıyndalǵan úkimetiniń Densaýlyq saqtaý mınıstrligi buǵan deıin 6 tamyzdan beri el aýmaǵyndaǵy qaqtyǵystardan keminde 1 282 adam qaza tapqanyn málimdegen.
Buǵan deıin hýsıtterdiń Adendegi prezıdent saraıyna jasaǵan shabýylynan 5 adam qaza tapqanyn habarlaǵan edik.
