Iemende bılik pen ońtústiktegi kúshter arasyndaǵy qaqtyǵys ýshyǵa tústi

ASTANA. KAZINFORM — Saýd Arabııasynyń qoldaýyna súıenetin Iemen úkimeti eldiń shyǵysyndaǵy Hadramaýt provıntsııasynda operatsııa bastalǵanyn málimdedi. Bul qadam hýsıtterge qarsy lager ishindegi kelispeýshiliktiń kúrt ýshyǵýy aıasynda jasaldy, dep habarlaıdy Kazinform menshikti tilshisi.

Iemen bıliginiń habarlaýynsha, operatsııa «beıbit sıpatta» júrgiziledi jáne buǵan deıin Birikken Arab Ámirlikteri qoldaıtyn Ońtústik ótpeli keńestiń baqylaýyna ótken áskerı nysandardy qaıtadan memlekettik baqylaýǵa alý maqsatyn kózdeıdi.

Sheshim Hadramaýt provıntsııasynyń gýbernatory Salem Ahmed Saıd ál-Hýnbashı tarapynan jarııalandy. Oǵan óńirdegi barlyq áskerı, ákimshilik jáne qaýipsizdik ókilettikteri berilgen.

Gýbernatordyń aıtýynsha, bul soǵys jarııalaý emes, kerisinshe, áskerı lagerlerdiń qaýipsizdikke qater tóndirý úshin paıdalanylýyna jol bermeý jáne Hadramaýtty turaqsyzdyqqa uryndyrmaý maqsatynda qolǵa alynǵan shara.

Sonymen qatar Ońtústik ótpeli keńestiń ókilderi operatsııa jarııalanǵannan keıin kóp uzamaı Saýd Arabııasynyń áskerı avıatsııasy áýeden soqqy jasaǵanyn málimdedi. Olardyń dereginshe, keminde jeti áýe soqqysy tirkelgen, onyń úsheýi jeltoqsan aıynda keńes baqylaýyna ótken Al-Hashaa áskerı lagerine baǵyttalǵan. Bul lager birneshe myń áskerı qyzmetkerdi ornalastyrýǵa qabiletti iri nysan sanalady.

Ońtústik ótpeli keńestiń ókili Amr ál-Bıd Saýd Arabııasyn halyqaralyq qaýymdastyqty jańylystyrdy dep aıyptap, beıbit operatsııa retinde jarııalanǵan sharanyń is júzinde áskerı kúsh qoldanýmen jalǵasqanyn aıtty.

Saýd Arabııasy tarapy áýe soqqylaryna qatysty ázirge resmı túsinikteme bergen joq.

BAQ derekterine sáıkes, Saýd Arabııasy qoldaıtyn kúshterge tıesili bronetehnıka Al-Hashaa lagerine qaraı jyljytylǵan. Al Ońtústik ótpeli keńes óz bólimshelerin tolyq jaýyngerlik daıyndyqqa keltirip, qatań jaýap berýge daıyn ekenin eskertti.

Bul jaǵdaı Saýd Arabııasy men Birikken Arab Ámirlikteri arasyndaǵy kelispeýshiliktiń tereńdeı túsýimen tuspa-tus kelip otyr. Buǵan deıin eki el Iemendegi áskerı naýqanda negizgi seriktes bolǵan. Alaıda sońǵy ýaqytta olardyń ustanymdary tek Iemende ǵana emes, óńirlik jáne ekonomıkalyq máseleler boıynsha da alshaqtaı bastaǵan.

Ońtústik ótpeli keńes óz kúshteriniń eldiń ońtústigindegi provıntsııalarda qalatynyn málimdep otyr. Al Saýd Arabııasy men resmı Iemen úkimeti bul jasaqtardy atalǵan óńirlerden shyǵarýdy talap etýde.

Sonymen qatar Aden halyqaralyq áýejaıy tóńiregindegi daǵdarys ta saqtalyp otyr. Keı derekterge sáıkes, saýd delegatsııasy mingen ushaqqa qonýǵa ruqsat berilmegennen keıin áýe qatynasy ýaqytsha toqtatylǵan.

Saýd Arabııasynyń Iemendegi elshisi Muhammed ál-Djaber Ońtústik ótpeli keńes jetekshisi Aıdarýs az-Zýbeıdıdi reısterge kedergi keltirdi dep aıyptasa, keńes óz kezeginde Er-Rııad áýe qatynasyna shekteý qoıdy dep málimdedi.

Aden áýejaıy hýsıtterdiń baqylaýynan tys aımaqtar úshin negizgi áýe qaqpasy sanalady. Onyń jabylýy gýmanıtarlyq jáne logıstıkalyq táýekelderdi kúsheıtip otyr.

Aıta keteıik, Iemen 2014 jyldan beri qaqtyǵys jaǵdaıynda ómir súrip keledi. Sol jyly Iran qoldaıtyn hýsıtter qozǵalysy el astanasy Sana qalasyn baqylaýǵa alǵan. Qazirgi jaǵdaı hýsıtterge qarsy kúshterdiń óz ishinde de tereń daǵdarys qalyptasqanyn kórsetip otyr.

Aıta keteıik, Saýd Arabııasy Iemen portyna soqqy jasady.