Iemende bes mıllıon adam azyq-túlik tapshylyǵyn tartyp otyr
ASTANA. KAZINFORM — BUU Lıvan, Gaza sektory jáne Iemendegi gýmanıtarlyq jaǵdaıdyń kúrt nasharlap bara jatqanyn eskertti. Myńdaǵan adam úılerin tastap ketýge májbúr bolsa, aýrýhanalar janarmaı tapshylyǵyna ushyrap, mıllıondaǵan turǵyn azyq-túlik kómegine muqtaj bolyp otyr. Bul týraly BUU jańalyqtar qyzmeti málim etti.
BUU Bas hatshysy AQSh pen Iran arasyndaǵy qarýly qaqtyǵystardyń kúsheıýine, sondaı-aq Irannyń Kýveıt pen Bahreınge soqqy jasaǵany týraly habarlamalarǵa alańdaýshylyq bildirdi. Sonymen qatar óńirden Lıvandaǵy bosqyndar sanynyń artýy, Gazadaǵy gýmanıtarlyq shekteýler jáne Iemendegi azyq-túlik daǵdarysynyń tereńdeýi jóninde málimetter túsip jatyr.
Antonıý Gýterrısh Iran men AQSh arasyndaǵy shabýyldar saldarynan beıbit turǵyndardyń qaza bolýy týraly aqparattarǵa alańdaýshylyq bildirip, taraptardy barynsha sabyr saqtaýǵa jáne jaǵdaıdyń odan ári ýshyǵýyna jol bermeýge shaqyrdy. Onyń aıtýynsha, bul dıplomatııalyq kelissózderge keri áser etýi múmkin.
BUU basshysy barlyq memleketterdiń egemendigi men aýmaqtyq tutastyǵyn qurmetteý qajettigin atap ótti. Sondaı-aq ol azamattyq ınfraqurylymǵa jasalǵan kez kelgen shabýyldy aıyptap, halyqaralyq gýmanıtarlyq quqyq boıynsha beıbit nysandarǵa soqqy jasaýǵa qatań tyıym salynatynyn eske saldy.
Lıvandaǵy gýmanıtarlyq jaǵdaı
Lıvanda gýmanıtarlyq ahýal kún saıyn kúrdelenip keledi. BUU málimetinshe, 1 maýsymda Izraıl áskeri jarııalaǵan evakýatsııa týraly buıryqtan keıin tek Beırýt qalasynyń ózinde shamamen 200 myń adam ońtústik mańaıdaǵy aýdandardan ketýge májbúr bolǵan.
Qazirgi ýaqytta 135 myńǵa jýyq adam ýaqytsha ornalastyrý ortalyqtarynda tirkelgen. Alaıda bul ortalyqtardyń kóbi lyq tolǵandyqtan, myńdaǵan turǵyn ashyq aspan astynda túneýge májbúr.
Soǵys qımyldarynyń densaýlyq saqtaý júıesine áseri de alańdatyp otyr. Lıvan Densaýlyq saqtaý mınıstrliginiń málimetinshe, 1 maýsymdaǵy áýe shabýyldary saldarynan bes adam qaza taýyp, taǵy 48 adam jaralanǵan. Olardyń arasynda dáriger men bes medıtsına qyzmetkeri bar.
Gazadaǵy medıtsınalyq evakýatsııalar
Gaza sektorynda da gýmanıtarlyq operatsııalar kóptegen qıyndyqtarǵa tap bolýda. «Kerem-Shalom» shekaralyq ótkizý beketine qol jetkizýdegi kidirister saldarynan aýrýhanalar men tuşylandyrý qondyrǵylaryna qajetti alty janarmaı tsısternasyn jetkizý múmkin bolmaǵan.
Soǵan qaramastan halyqaralyq uıymdar dári-dármek, gıgıenalyq quraldar, kórpe men shatyrlar salynǵan myńnan astam konteınerdi jetkizdi.
Sońǵy eki aptada Dúnıejúzilik densaýlyq saqtaý uıymynyń qoldaýymen Gazadan shetelde emdelý úshin júzge jýyq naýqas jáne olardy alyp júrgen 130 shaqty adam evakýatsııalandy. Degenmen myńdaǵan turǵyn áli de sektor ishinde kórsetilmeıtin mamandandyrylǵan medıtsınalyq kómekke muqtaj.
Iemendegi azyq-túlik daǵdarysy
BUU Iemendegi azyq-túlik jaǵdaıynyń da kúrt nasharlap bara jatqanyn málimdedi. Uıym derekterine sáıkes, úkimet baqylaýyndaǵy aýmaqtarda turatyn shamamen bes mıllıon adam nemese árbir ekinshi turǵyn azyq-túlik tapshylyǵynyń joǵary deńgeıine tap bolǵan.
Maýsym men qyrkúıek aralyǵynda mundaı jaǵdaıdaǵy adamdar sany 5,4 mıllıonǵa jetýi múmkin.
BUU agenttikteri shuǵyl qarjylandyrý men aýqymdy gýmanıtarlyq kómek kórsetilmese, mıllıondaǵan adamnyń ashtyqqa, durys tamaqtanbaýǵa jáne kúnkóris kózinen aıyrylýǵa ushyraý qaýpi bar ekenin eskertti.
Osyǵan baılanysty BUU 2026 jylǵa arnalǵan Iemen boıynsha gýmanıtarlyq áreket jospary aıasynda 12 mıllıon turǵynǵa ómirlik mańyzy bar kómek kórsetý úshin 2,16 mlrd dollar kóleminde qarjy surady.
Buǵan deıin Izraıldiń bitim jarııalanǵannan keıin de Lıvan aýmaǵyna soqqylaryn jalǵastyrǵany habarlanǵan bolatyn.
