Iemende áýe soqqysynan 14 hýsıt qaza tapty
ASTANA. KAZINFORM – Iemen úkimetin qoldaıtyn kúshter seısenbi kúni keshke Qyzyl teńiz jaǵalaýyndaǵy Hodeıda portty qalasynyń ońtústiginde hýsıtterdiń pozıtsııalaryna jasalǵan soqqylardan toptyń 14 múshesi qaza tapqanyn habarlady. Bul týraly Anadolý jazdy.
Úkimetti qoldaıtyn «Ulttyq qarsylasý kúshteriniń» baspasóz qyzmeti taratqan málimdemede hýsıtterdiń pozıtsııalaryna soqqy jasalyp, «nysanalar dál kózdelgeni» aıtylǵan.
Hýsıtter ázirge bul málimdemege qatysty pikir bildirgen joq.
Seısenbi kúni Iemenniń Prezıdenttik basshylyq keńesi hýsıtterge qarsy qosymsha «tejeý» sharalaryn maquldap, memlekettik ınstıtýttardy qalpyna keltirý jáne eldiń birqatar aýmaǵyndaǵy hýsıtterdiń baqylaýyn toqtatý jónindegi jumysty jalǵastyratynyn málimdedi.
Iemenniń memlekettik Saba aqparat agenttiginiń habarlaýynsha, sheshim Saýd Arabııasynyń astanasy Er-Rııadta ótken keńes otyrysynda qabyldanǵan.
Jıynda eldegi áskerı, qaýipsizdik jáne ekonomıkalyq ahýal, sondaı-aq hýsıtterdiń áreketine qarsy memlekettiń strategııalyq qadamdary qaraldy.
– Memleket óz ınstıtýttaryn qalpyna keltirý, búkil el aýmaǵynda bıligin ornyqtyrý jáne Iran qoldaıtyn hýsıtterdiń áreketinen týyndaǵan gýmanıtarlyq zardaptardy toqtatý jónindegi kúsh-jigerin jalǵastyrady, – delingen keńes málimdemesinde.
Iemende úkimet kúshteri men 2014 jyly eldiń bir bóligin, sonyń ishinde astana Sanany baqylaýǵa alǵan hýsıtter arasyndaǵy uzaqqa sozylǵan soǵystan keıin 2022 jyldan beri salystyrmaly tynyshtyq ornaǵan edi.
Alaıda ótken aıdyń basynda Marıb, Ál-Djaýf, Ál-Dalı jáne Taız aýdandarynda úkimet áskeri men hýsıtter arasyndaǵy qaqtyǵystar qaıta jandandy.
Saýd Arabııasy bastaǵan koalıtsııa Adende ornalasqan Iemen úkimeti men onyń qarýly kúshterin qoldaıdy. Al Iran hýsıtterge qoldaý kórsetedi dep aıyptalyp keledi.
2023 jyldyń sońynda Gaza sektorynda soǵys bastalǵannan beri hýsıtter aımaqtaǵy áskerı qımyldarǵa belsendi aralasyp, Izraılge jáne Qyzyl teńizdegi Izraılmen baılanysty kemelerge shabýyl jasap keledi.
Eske sala ketsek, buǵan deıin Iemen qarýly kúshteri bir táýlikte hýsıtterge qarsy 133 operatsııa júrgizgenin jazdyq.
Sondaı-aq BUU Iemende qaýipsizdik jaǵdaıy nasharlaǵanyn málimdedi.
