Iemen jaǵalaýynda órtengen alyp tankerden munaı tógilmeýi úshin arnaıy operatsııa bastaldy

ASTANA. KAZINFORM – Qyzyl teńizde ıemendik hýsıt kóterilisshileri shabýyl jasaǵan tankerden mıllıon barrelge jýyq munaıdyń tógilýine jol bermeý operatsııasy júrip jatyr. 21 tamyzda shabýyl jasalǵannan keıin bári Oman jaǵalaýyndaǵy Grekeııa týy bar MV Sounion tankerin tastap ketken, dep jazady VVS.

Grek kemesi artıllerııa oqtary men belgisiz snarıadtarǵa ushyraǵanyn ótken aptada Qyzyl teńizdegi, Aden shyǵanaǵyndaǵy jáne Arab teńizindegi saýda kemeleri arasynda aqparat almasý jónindegi brıtandyq bastamasy UKMTO habarlady.

25 ekıpaj múshesin eýropalyq áskerı keme qutqardy.

Keıinirek hýsıtter jarııalaǵan vıdeodan olardyń tankerge túsip, palýbany birneshe jerden órtep jibergeni belgili boldy. Hýsıt kóshbasshysy muny batyl shabýyl dep atady.

Dúısenbi kúni qutqarý operatsııasynyń qaýipsizdigin qamtamasyz etetin Eýroodaq áskerleri keme áli de órtenip jatqanyn málimdedi.

Sarapshylar órt tez arada aýyzdyqtalmasa, tarıhta buryn-sońdy bolmaǵan munaı tógilýi bolatynyn eskertedi.

AQSh Memlekettik departamenti buǵan deıin MV Sounion tankerinen munaı tógilýi 1989 jylǵy Alıaska jaǵalaýynda qulaǵan Exxon Valdez tankeriniń apatynan tórt ese kóp bolýy múmkin dep eskertti.

Ol kezde 2100 km jaǵalaý syzyǵy lastanǵan.

Sońǵy 10 aıda hýsıtter Qyzyl teńizdegi birneshe sheteldik kemelerge shabýyl jasady. Iran qoldaıtyn top óz áreketterin HAMAS-qa qoldaý kórsetý dep túsindiredi.