Iemen úkimetiniń áskeri hýsıtterge qarsy shabýyl bastady
ASTANA. KAZINFORM – Birneshe jylǵa sozylǵan tynyshtyqtan keıin Iemende qarýly qaqtyǵys qaıta kúsheıip, úkimet áskeri hýsıtterdiń pozıtsııalaryna birden tórt provıntsııada shabýyl bastady, dep habarlaıdy Kazinform agenttiginiń Taıaý Shyǵystaǵy menshikti tilshisi.
Halyqaralyq deńgeıde moıyndalǵan Iemen úkimetiniń kúshteri dúısenbi kúni hýsıtterdiń pozıtsııalaryna qarsy aýqymdy operatsııaǵa kiristi. Áskerılerdiń negizgi maqsatynyń biri – el astanasy Sanany qaıtarý.
– Hýsıtterden el astanasy Sanany qaıtaryp alý týraly sheshim qabyldandy, – dedi Iemen qorǵanys mınıstriniń kómekshisi, general-maıor Samır as-Sabrı Al Jazeera telearnasyna bergen suhbatynda.
Irannyń qoldaýyna ıe «Ansar Allah» qozǵalysynyń hýsıtteri 2014 jyly Sana qalasyn jáne Iemenniń soltústigindegi aýmaqtardyń edáýir bóligin baqylaýǵa alǵan.
Olarǵa qarsy turǵan halyqaralyq deńgeıde moıyndalǵan Iemen úkimeti eldiń ońtústigindegi Aden qalasynda jumys isteıdi. Úkimet kúshterine Iemenmen soltústikte shektesetin Saýd Arabııasy qoldaý kórsetedi.
Qazirgi shabýyl ál-Djaýf, ál-Baıda, Taız jáne Hodeıda provıntsııalarynda júrip jatyr. Úkimet áskeri hýsıtterdiń kúshterin birneshe baǵytqa bólýge jáne Sanaǵa jaqyndaýǵa tyrysyp jatyr.
Bul rette ál-Djaýf provıntsııasyna erekshe mán berilip otyr. Óıtkeni atalǵan óńir Sanaǵa aparatyn negizgi baǵyttardyń biri sanalady.
Iemen úkimetiniń áskeri birqatar ýchaskede alǵa jyljyǵanyn, sondaı-aq hýsıtterdiń pozıtsııalaryna áýe, zymyran jáne ushqyshsyz ushý apparattary arqyly soqqy berilgenin habarlady.
Úkimetti qoldaıtyn qarýly qurylymdar baǵyttardyń birinde strategııalyq pozıtsııalardy basyp alǵanyn jáne 23 hýsıttiń qaza tapqanyn málimdedi.
Al hýsıtter ál-Djaýftaǵy shabýylǵa toıtarys berip, úkimet kúshterine kómekke kele jatqan bólimshelerge zymyranmen soqqy jasaǵanyn málimdep otyr.
Iemen Prezıdenttik basshylyq keńesiniń tóraǵasy Rashad ál-Alımı operatsııa eldiń búkil aýmaǵynda memlekettik baqylaý qalpyna kelgenge deıin jalǵasatynyn aıtty.
– Qarýly kúshter memlekettik ınstıtýttar qalpyna keltirilip, memleket bıligi Iemenniń búkil aýmaǵyna taraǵanǵa deıin óziniń konstıtýtsııalyq mindetin oryndaýdy jalǵastyrady, – dedi Rashad ál-Alımı.
Qazirgi shıelenis 2022 jyly BUU-nyń araǵaıyndyǵymen bitim jasalǵannan bergi eń iri qaqtyǵystardyń birine aınaldy.
Halyqaralyq kóshi-qon uıymynyń málimetinshe, 3 qyrkúıekten beri Taız jáne Hodeıda provıntsııalaryndaǵy shaıqastar saldarynan shamamen 18,5 myń adam úıin tastap ketýge májbúr bolǵan.
Buǵan deıin hýsıtter men Iemen úkimeti kúshteri arasyndaǵy shaıqasta 80-nen astam adamnyń qaza tapqany habarlanǵan. Sondaı-aq hýsıtterdiń Saýd Arabııasynyń qalalary men energetıkalyq ınfraqurylym nysandaryna jasaǵan soqqylarynan 70-ten astam adam zardap shekti.
