Iemen úkimeti otstavkaǵa ketti
ASTANA. KAZINFORM — Iemenniń Prezıdenttik basqarý keńesi úkimettiń otstavkasyn qabyldap, mınıstrler kabınetiniń jańa basshysyn maquldady, dep habarlaıdy Kazinform menshikti tilshisi.
Iemenniń Prezıdenttik basqarý keńesi premer-mınıstr Salem Saleh bın Breıktiń otstavkasyn qabyldap, syrtqy ister mınıstri Shaııa Mohsen az-Zındanıdi jańa premer-mınıstr etip taǵaıyndady. Bul sheshim týraly beısenbi kúni Iemenniń SABA aqparat agenttigi habarlady.
Jarııalanǵan Jarlyqqa sáıkes, Shaııa Mohsen az-Zındanıge mınıstrler kabınetiniń jańa quramyn qurý mindeti júktelgen. Qazirgi úkimet óz mindetterin atqarýdy jańa kabınet bekitilgenge deıin jalǵastyrady. Resmı málimdemede atap ótilgendeı, úkimettiń otstavkaǵa ketýi eldegi sońǵy saıası ózgeristerdi eskere otyryp, jańartylǵan kabınet qalyptastyrýǵa jol ashýǵa baǵyttalǵan.
Premer qyzmetinen ketken Salem bın Breık Prezıdenttik basqarý keńesi tóraǵasynyń qarjy jáne ekonomıkalyq máseleler jónindegi keńesshisi bolyp taǵaıyndaldy.
Prezıdenttik basqarý keńesi 2022 jyly quryldy jáne ol halyqaralyq qaýymdastyq tanyǵan ujymdyq basqarý organy. Ony Rashad Muhammed ál-Álımı basqaryp otyr. Keńes jáne onyń baqylaýyndaǵy úkimet negizinen eldiń ońtústiginde ornalasqan jáne «Ańsar Alla» qozǵalysynyń baqylaýynan tys aýmaqtardy basqaryp keledi.
Iemendi kim basqaryp otyr
Prezıdenttik basqarý keńesi (PBK) jáne hýsıtter — Iemendegi azamattyq soǵysta bir-birine qarsy kúresýshi eki tarap. PBK halyqaralyq deńgeıde tanylǵan úkimet bolsa, hýsıtter («Ańsar Alla» qozǵalysy) eldiń soltústigin, sonyń ishinde el astanasy Sanany baqylaýynda ustap otyr.
Osylaısha, Iemenniń Sanany qosa alǵanda soltústigi men ortalyq bóligi PBK ókilettigin moıyndamaıtyn hýsıtterdiń baqylaýynda qalyp otyr. Aqyry elde kópjyldyq qaqtyǵystardan týyndaǵan saıası jáne ákimshilik bóliný saqtalyp keledi.
Jańa premer-mınıstrdiń taǵaıyndalýy — Prezıdenttik basqarý keńesiniń sońǵy aptalarda qabyldaǵan kadrlyq sheshimderi keń aýqymynyń bóligi, onyń ishinde keńes quramy men úkimet qurylymyndaǵy ózgerister bar.
BAQ habarlaýynsha, sońǵy aılarda Iemendegi jaǵdaı eldiń ońtústik jáne shyǵys aımaqtaryn baqylaýǵa qatysty shıelenistiń artýymen, sondaı-aq Iemen qaqtyǵysyn sheshýge qatysyp otyrǵan aımaqtyq jáne syrtqy oıynshylar arasyndaǵy kelispeýshilikterdiń tereńdeýimen qatar júrdi.
Buǵan deıin Saýd Arabııasynyń qoldaýyna súıenetin Iemen úkimeti eldiń shyǵysyndaǵy Hadramaýt provıntsııasynda operatsııa bastalǵanyn málimdedi. Bul qadam hýsıtterge qarsy lager ishindegi kelispeýshiliktiń kúrt ýshyǵýy aıasynda jasaldy.