Iemen Tel-Avıv pen Eılat portyna ushqyshsyz ushaqtarmen soqqy jasady

ASTANA. KAZINFORM – Iemen qarýly kúshteriniń resmı ókili Tel-Avıvtegi áskerı nysandar men Eılat portyna ushqyshsyz basqarylatyn ushaqpen soqqy bergeni týraly habarlady, dep jazdy IRNA aqparat agenttigi. 

ıAhıa Sarı óz málimdemesinde Iemen qarýly kúshteri Palestına men Lıvanǵa qoldaý kórsetý maqsatynda Tel-Avıvtegi Izraıl áskerı nysanasyna shabýyl jasaý úshin «ıAfa» ushqyshsyz basqarylatyn ushaǵyn paıdalanǵanyn atap ótti. 

Ol sondaı-aq Iemen qarýly kúshteriniń «Samad 4» tıpti ushqyshsyz basqarylatyn tórt ushaǵynyń kómegimen Ýmm-er-Rashrash aımaǵynda (Eılat porty) sıonıstik áskerı nysandarǵa da shabýyl jasaǵanyn qosty. 

Sarı eki operatsııanyń sátti ótkenin habarlady.

Iemen qarýly kúshteriniń resmı ókili Palestına men Lıvan halqyna «basqynshylardy qýyp shyqqansha jáne olardyń jaýlap alý josparlary buzylmaıynsha» qoldaý kórsetýdi jalǵastyratynyn basa aıtty. 

30 qyrkúıekte Izraıl áskeriniń ondaǵan ushaǵy Izraılge jasalǵan shabýylǵa jaýap retinde Iemendegi hýsıtter nysandaryna soqqy bergenin málimdedi. Soqqy nysany – Hodeıda portyndaǵy elektr stantsııalary men munaı tsısternalary. 

Sol kúni Izraıl armııasy Lıvannyń ońtústiginde ornalasqan shekaralyq aýdandardaǵy lıvandyq «Hezbolla» tobynyń nysandaryna «shektelgen operatsııa» bastaǵanyn habarlady. 

Lıvan premer-mınıstriniń mindetin atqarýshy Nadjıb Mıkatı óz eliniń «tarıhyndaǵy eń qaýipti kezeńderdiń birin» bastan ótkerip jatqanyn aıtyp, Birikken Ulttar Uıymyn Izraıldiń áýe shabýyly saldarynan baspanasyz qalǵan mıllıon adamǵa kómek kórsetýge shaqyrdy. 

1 qazanda Iran Izraıl aýmaǵyna ballıstıkalyq zymyran ushyrdy.