Iemende referendým aldynda eki jyldyq ótpeli kezeń bastaldy

ASTANA. KAZINFORM — Iemenniń Ońtústik ótpeli keńesiniń tóraǵasy Aıdarýs az-Zýbeıdı juma kúni elde eki jyldyq ótpeli kezeńniń bastalǵanyn málimdedi, dep habarlaıdy Sınhýa.

Bul kezeńde keńes eldiń ońtústik aımaqtarynda ákimshilik basqarýdy júzege asyrady, al odan keıin Iemenniń ońtústiginiń táýelsizdigi týraly referendým ótkizý josparlanyp otyr.

Ońtústik ótpeli keńespen baılanysty AIC telearnasy arqyly jasaǵan úndeýinde Aıdarýs az-Zýbeıdı bul sheshimniń, onyń aıtýynsha, halyqtyq mandatqa, sondaı-aq óńirdegi qaýipsizdik pen ákimshilik saladaǵy sońǵy oqıǵalarǵa baılanysty qabyldanǵanyn aıtty.

— Eki jyldyq ótpeli kezeń Ońtústik Iemen memleketiniń táýelsizdigin qalpyna keltirý týraly konstıtýtsııalyq deklaratsııany qabyldaýmen aıaqtalady, — dedi ol. 

Onyń aıtýynsha, bul qujat 2028 jylǵy 2 qańtarda kúshine enýi tıis.

Az-Zýbeıdıdiń sózinshe, ótpeli kezeńnen keıin halyqtyń ózin-ózi anyqtaý jónindegi referendýmy ótedi. Ol halyqaralyq deńgeıde moıyndalǵan normalarǵa saı, beıbit ári ashyq tetikterdi qoldaný arqyly uıymdastyrylady.

Sonymen qatar ol 2028 jylǵa josparlanǵan konstıtýtsııalyq deklaratsııa belgilengen merzimnen buryn kúshine enýi múmkin ekenin de atap ótti. Bul Ońtústik ótpeli keńestiń úndeýleri eskerýsiz qalsa nemese Ońtústik Iemenniń halqy, aýmaǵy ne kúshteri áskerı agressııaǵa ushyraǵan jaǵdaıda júzege asýy yqtımal.

— Barlyq nusqa kún tártibinde qala beredi, — dedi ol.

Saýd Arabııasy qoldaıtyn Iemen úkimeti ázirge Ońtústik ótpeli keńestiń bul málimdemesine qatysty pikir bildirgen joq.

Budan buryn Iemende bılik pen ońtústiktegi kúshter arasyndaǵy qaqtyǵys ýshyǵa túskenin jazǵanbyz.