Iemen parlamenti jappaı mobılızatsııa jarııalaýdy maquldady
ASTANA. KAZINFORM – Iemenniń Ókilder palatasy hýsıttermen aradaǵy shıelenis aıasynda elde jappaı mobılızatsııa jarııalaýdy maquldady, dep habarlaıdy SABA.
Sheshim parlament spıkeri Sultan ál-Barakanıdiń tóraǵalyǵymen beınekonferentsııa formatynda ótken keńeıtilgen otyrysta qabyldandy.
Buǵan deıin Iemen Prezıdenttik basshylyq keńesiniń tóraǵasy ári Qarýly kúshterdiń joǵarǵy bas qolbasshysy Rashad ál-Alımı parlamentke jappaı mobılızatsııa jarııalaý týraly ótinish jasaǵan.
SABA málimetinshe, sheshim beıbit turǵyndardy, respýblıkalyq qurylys pen konstıtýtsııalyq zańdylyqty, sondaı-aq eldiń egemendigi men aýmaqtyq tutastyǵyn qorǵaý maqsatynda qabyldanǵan.
– Jappaı mobılızatsııa Konstıtýtsııaǵa jáne qoldanystaǵy zańnamaǵa sáıkes júzege asyrylady. Sheshim jarııalanǵan sátten bastap kúshine enip, ony qabyldaýǵa negiz bolǵan jaǵdaılar toqtaǵanǵa deıin qoldanylady, – delingen habarlamada.
Parlament saıası kúshterdi ulttyq birlikke jáne is-qımyldy úılestirýge shaqyrdy. Sonymen qatar depýtattar Saýd Arabııasy bastaǵan Arab koalıtsııasyn qoldaıtynyn málimdedi.
Buǵan deıin hýsıtterdiń Saýd Arabııasy aýmaǵyna zymyrandar men ushqyshsyz ushý apparattary arqyly birneshe ret soqqy jasaǵany, al Saýd Arabııasynyń Iemen aýmaǵyna áýe soqqylarymen jaýap bergeni habarlanǵan.
Sondaı-aq Er-Rııad qoldaıtyn Iemenniń halyqaralyq deńgeıde moıyndalǵan úkimetiniń kúshteri Bab-el-Mandeb buǵazy mańyndaǵy birqatar mańyzdy pozıtsııadan aıyrylǵan.
Iemendegi qarýly qaqtyǵys 2022 jyldan beri qalyptasqan salystyrmaly tynyshtyqtan keıin qaıta jandandy.
Aıta keteıik, hýsıtter Saýd Arabııasynyń Iemenge 28 ret áýe soqqysyn jasaǵanyn málimdedi.
